ການເຮັດບຸນເຂົ້າປະດັບດິນ ເປັນການເຮັດບຸນເພື່ອອຸທິດໃຫ້ແກ່ຍາດຕິພີ່ນ້ອງທີ່ລ່ວງລັບ ເພື່ອບູຊາວິນຍານບັນພຣະບູຣຸດ ແລະ ຜູ້ໄຮ້ຍາດຂາດມິດ ໂດຍຈະຈັດເຂົ້າປາອາຫານໃນ ມື້ແຮມ 13 ຄໍ່າ ເດືອນ 9 ປະກອບດ້ວຍ: ເຂົ້າ, ເຄື່ອງຄາວຫວານ, ໝາກພູ, ຢາສູບ, ກ້ວຍອ້ອຍ ຫຼືສິ່ງຂອງຕ່າງໆ ທີ່ພໍຫາໄດ້ໃນຄອບຄົວ ຫຼືທ້ອງຖິ່ນຂອງຕົນ ໄດ້ມາແລ້ວຫໍ່ໃສໃບຕອງກ້ວຍ ຮ້ອຍເປັນພວງແລ້ວເອົາ ໄປແຂວນໄວ້ໃນງ່າໄມ້ ຕ້າຍບ້ານ ຫຼືວັດ ຫຼືວາງໄວໃນດິນກ່ອນຕາເວັນຈະຂຶ້ນໃນມື້ 14 ຄ່ຳເດືອນ 9 ດັບ ພ້ອມທັງກ່າວເຊີນວິນຍາຂອງເຫຼົ່າຍາດພີ່ນ້ອງຂອງເຮົາໃຫ້ມາຮັບສ່ວນກຸສົນຄັ້ງນີ້.
ຕໍ່ມາຕອນເຊົ້າກໍເຮັດພາເຂົ້າ ເຄື່ອງຕັກບາດເຂົ້າໄປຍັງວັດ ເພື່ອທຳບຸນຕັກບາດຖວາຍສັງຄະທານ ບາງຄົນກໍຖວາຍເປັນພັດຕາຫານ ບາງຄົນກໍຖວາຍເປັນພາເຂົ້າທິບ ໃນຕອນເຊົ້າ ເວລາ 7 ໂມງເປັນຕົ້ນໄປ. ການເຮັດບຸນເຂົ້າປະດັບດິນ ເປັນປະເພນີໜຶ່ງທີ່ມີໃນ ຮີດ 12 ຄອງ 14 ນິຍົມກັນເຮັດໃນມື້ 14 ຄ່ຳດັບເດືອນ 9.
ສຳລັບການເຮັດຫໍ່ເຂົ້າປະດັບດິນ ຄວນຫໍ່ໃສ່ໃບຕອງ ໃບບົວ ຫຼື ໃບໄມ້ປະເພດຕ່າງໆ (ບໍ່ຄວນໃສ່ກ່ອງໂຟມ ຫລື ຖົງຢາງ)
ຄໍາເວົ້າເວລາຢາຍຫໍ່ເຂົ້າປະດັບດິນ:
ວາງຫໍ່ເຂົ້າລົງກັບພື້ນດິນ ໄຕ້ທູບທຽນບູຊາ ຢາດນໍ້າ ຫລື ບໍ່ຢາດນໍ້າ ເວົ້າເອົາກະໄດ້ວ່າ: ຂ້າພະເຈົ້າຊື່………..ໄດ້ແຈກຢາຍຫໍ່ເຂົ້າປະດັບດິນ ບູຊາແຜ່ນດິນ ພຣະແມ່ທໍລະນີ, ຍາດພີ່ນ້ອງຊື່……….. ຕະຫຼອດເຖິງຜີບໍລິສາດທີ່ມີຍາດ ແລະ ບໍ່ມີຍາດ ໃຫ້ມາຮັບ……….ໃຫ້ໄດ້ຢູ່ໄດ້ກິນ ແລ້ວໃຫ້ໄປເກີດທີ່ດີເຖິງສຸກ.