ແຫລ່ງຂ່າວຈາກ ແຂວງຊຽງຂວາງ ໄດ້ໃຫ້ຮູ້ວ່າ: ແຂວງຊຽງຂວາງ ຈັດກອງປະຊຸມ ຜ່ານແບບແຜນຫໍຫລັກເມືອງ ແລະ ປະຕູໂຂງຂອງແຂວງ ໃນວັນທີ 13 ກຸມພາ 2024 ໂດຍການເປັນປະ ທານຂອງ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ມີຫົວໜ້າ-ຮອງຫົວໜ້າພະແນກການ, ອົງການແລະ ວິຊາການທີ່ກ່ຽວຂ້ອງເຂົ້າຮ່ວມ.
ພ້ອມນີ້, ທ່ານເຈົ້າແຂວງ ກໍໄດ້ສະຫຼຸບຄວາມຄິດເຫັນ ແລະ ຕົກລົງເປັນເອກະພາບເອົາຮູບແບບປະຕູໂຂງຕາມແບບທີ່ສະເໜີມາ, ແຕ່ປ່ຽນແປງເລັກນ້ອຍບາງຈຸດ, ສ່ວນຫໍຫລັກເມືອງແມ່ນຕົກລົງໃຫ້ແຕ້ມແບບຕື່ມອີກ ເພື່ອໃຫ້ມີຫລາຍແບບມາສົບທຽບກັນ ແລະ ສະເໜີປັບປຸງແບບເກົ່າໃນບາງຈຸດ ເພື່ອເອົາມາຜ່ານກອງປະຊຸມຕື່ມອີກໃນຕໍ່ໜ້າ ເພື່ອຄັດເລືອກເອົາແບບຫໍຫລັກເມືອງໃຫ້ຄູ່ບ້ານຄູ່ເມືອງ, ເລືອກເອົາແບບທີ່ເໝາະສົມທີ່ສຸດ ເນື່ອງຈາກສ້າງແລ້ວຈະເປັນບ່ອນ ກາບໄຫວ້ ສັກກາລະບູຊາ.
ຂ່າວຈາກ: ບຸນມີ ແສງທຸມມີ.