ຜູ້ໃຊ້ລົດຫຼາຍຄົນເລີ່ມຄຳນຶງເຖິງການໃຊ້ລົດໃນອະນາຄົດ ວິກິດດ້ານເຊື້ອໄຟທີ່ອາດຈະເກີດຂຶ້ນ ລວມໄປເຖິງສິ່ງແວດລ້ອມທີ່ໄດ້ຮັບຜົນກະທົບຈາກການປ່ອຍກ໊າສຂອງລົດ ເຮັດໃຫ້ເກີດຄຳຖາມຂຶ້ນມາວ່າ ລົດໄຟຟ້າ ຈະເຂົ້າມາແທນລົດນໍ້າມັນໄດ້ຫຼືບໍ່ ມື້ນີ້ເຮົາຈະມາບອກເຫດຜົນວ່າເປັນຫຍັງຫຼາຍຄົນຈຶ່ງຫັນໄປໃຊ້ລົດໄຟຟ້າແທນລົດນໍ້າມັນ.
- ເປັນມິດຕໍ່ສິ່ງແວດລ້ອມ: ເພາະບໍ່ມີການປ່ອຍມົນລະພິດທາງອາກາດ ລົດໄຟຟ້າຂັບເຄື່ອນດ້ວຍໄຟຟ້າ ເຮັດໃຫ້ຕົວລົດບໍ່ສ້າງມົນລະພິດຄືກັບລົດນໍ້າມັນ.
- ປະຢັດຄ່າໃຊ້ຈ່າຍ: ເພາະບໍ່ຕ້ອງໃຊ້ນໍ້າມັນເຊື້ອໄຟ ແລະ ມີຄ່າສ້ອມແປງໜ້ອຍກວ່າລົດທົ່ວໄປ.
- ລາຄາຖືກກວ່າລົດທົ່ວໄປ: ເນື່ອງຈາກລັດຖະບານລາວໄດ້ກຳນົດໃຫ້ການນໍາເຂົ້າລົດໄຟຟ້າບໍ່ຕ້ອງເສຍພາສີ.
- ລາຄາສາກໄຟຟ້າຖືກກວ່າເຕີມນໍ້າມັນ: ຫາກຂັບຂີ່ໃນໄລຍະທາງທີ່ເທົ່າກັນ ລົດໄຟຟ້າຈະມີຄ່າໃຊ້ຈ່າຍທີ່ຖືກກວ່າໃຊ້ລົດນໍ້າມັນ.
- ສາກເອງຢູ່ບ້ານໄດ້: ຫາກຕິດຕັ້ງເຄື່ອງສາກໄຟທີ່ເປັນມາດຕະຖານຄວາມປອດໄພ ເຮົາກໍສາມາດສາກຢູ່ບ້ານໄດ້ເອງໂດຍບໍ່ຕ້ອງຂັບອອກໄປເຕີມຢູ່ປໍ້າ.
- ງຽບ ເບົາ ບໍ່ມີສຽງດັງ: ລົດໄຟຟ້າ ເຮັດວຽກດ້ວຍມໍເຕີໄຟຟ້າ ເຮັດໃຫ້ຕົວລົດມີສຽງເບົາ ແລະ ງຽບກວ່າລົດຍົນໃຊ້ນໍ້າມັນ.
ເຖິງຢ່າງໃດກໍຕາມ, ກ່ອນທີ່ຈະປ່ຽນໃຈໃຊ້ລົດນໍ້າມັນເຮົາຄວນພິຈາລະນາ ແລະ ຫາຂໍ້ມູນຕ່າງໆໃຫ້ດີສາກ່ອນ ເພາະທັງລົດໄຟຟ້າ ແລະ ລົດນໍ້າມັນກໍມີທັງຂໍ້ດີຂໍ້ເສຍທີ່ແຕກຕ່າງກັນ ຂຶ້ນກັບວ່າເຮົາພໍໃຈເລືອກໃຊ້ອັນໃດ ເຊິ່ງຂໍ້ເສຍຂອງລົດໄຟຟ້າທີ່ພົບເຫັນສ່ວນໃຫຍ່ກໍຄື ໃຊ້ເວລາໃນການສາກດົນ ແລະ ບ່ອນສາກໄຟຍັງໜ້ອຍ ຖ້າຫາກເດີນທາງໄກ ຫຼືໄປໃນເຂດທີ່ຢູ່ນອກເມືອງ ລົດອາດຈະແບັດໝົດໄດ້.