ເມືອງເຟືອງ, ແຂວງ ວຽງຈັນ ເປັນອີກເມືອງໜຶ່ງທີ່ມີທິວທັດສວຍສົດງົດງາມ ເຊິ່ງເຕັມໄປດ້ວຍມົນສະເໜ່ທາງດ້ານທຳມະຊາດແບບທ້ອງຖິ່ນ ແລະ ຖືວ່າເປັນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຢູ່ຕະຫຼອດ ທັງນັກທ່ອງທ່ຽວພາຍໃນ ແລະ ຕ່າງປະເທດ, ເນື່ອງຈາກວ່າ ການເດີນທາງຄ່ອນຂ້າງສະດວກສະບາຍ ໄລຍະທາງກໍບໍ່ໄກຈາກ ນະຄອນຫຼວງ ວຽງຈັນຫຼາຍ. ນອກຈາກນີ້, ເມືອງເຟືອງ ຍັງອ້ອມຮອບໄປດ້ວຍພູຜາປ່າໄມ້ ແລະ ສາຍນ້ຳ ທີ່ອຸດົມສົມບູນ ໃຫ້ຄວາມຮູ້ສຶກສົດຊື່ນ, ສະຫງົບ ກັບທິວທັດທຳມະຊາດອັນສວຍງາມທີ່ເຮັດໃຫ້ຫຼົງໄຫຼ.
ເມືອງເຟືອງຕັ້ງຢູ່ ທາງຕາເວັນຕົກສຽງເໜືອຂອງແຂວງວຽງຈັນ ຂີ່ມາຕາມທາງ ເລກທີ 13 ເໜືອ ຫລື ມາທາງດ່ວນກໍໄດ້ ແລ້ວລ້ຽວຊ້າຍ ບ່ອນ ຂົວຫີນເຫີບ ມີທີ່ພັກໃຫ້ບໍລິການຢູ່ໃນຕົວເມືອງ ແລະ ຕາມແຄມແມ່ນ້ຳ ນະຄອນຫຼວງ ວຽງຈັນ – ເມືອງເຟືອງ ໃຊ້ເວລາເດີນທາງປະມານ 2-3 ຊົ່ວໂມງເທົ່ານັ້ນ.