ເມັດພາສຕິກແມ່ນຄ້າຍຄືເມັດໂລໂກ້ນ້ອຍໆທີ່ມີຫຼາຍຫຼາກສີສັນ ໄດ້ຖືກລວມເຂົ້າກັນເປັນສິ່ງຂອງຈໍານວນຫຼາຍທີ່ເຮົາໃຊ້ໃນຊີວິດປະຈໍາວັນ ເມັດພາສຕິກມັນມີລັກສະນະເປັນເມັດນ້ອຍໆ, ວົງມົນ, ຄ້າຍຄືລູກປັດທີ່ມາຈາກທາດປະສົມໄຮໂດຄາບອນ ເຊິ່ງໄດ້ມາຈາກປີໂຕລ້ຽມ ແລະ ແກັສທຳມະຊາດ.
ສຳລັບຄຸນປະໂຫຍດຂອງເມັດພາສຕິກນັ້ນມີຫຼາກຫຼາຍ ມັນຈະຖືກປຸງແຕ່ງເປັນຜະລິດຕະພັນຕ່າງໆໂດຍໃຊ້ຂະບວນການຕ່າງໆເຊັ່ນ: ການສີດພາສຕິກ, ການເປົ່າພາສຕິກ, ການລີດພາສຕິກ ແລະ ການອັດລີດພາສຕິກ.
ປະເພດຂອງເມັດພາສຕິກນັ້ນມີຫຼາຍປະເພດຄື:
- PE (Polyethylene): ໃຊ້ເພື່ອເຮັດຖົງຢາງ, ຟີມຫໍ່ອາຫານ, ຂວດນ້ໍາ.
- PP (Polypropylene): ໃຊ້ເພື່ອເຮັດພາຊະນະບັນຈຸອາຫານ, ກ່ອງພາສຕິກ ແລະ ສິ້ນສ່ວນລົດຍົນ.
- PS (Polystyrene): ໃຊ້ເພື່ອເຮັດໂຟມ, ກ່ອງໂຟມ, ຝາປິດອາຫານ.
- PVC (Polyvinyl Chloride): ໃຊ້ເພື່ອເຮັດທໍ່ນ້ໍາ, ທໍ່ໄຟຟ້າ ແລະ ໜັງທຽມ.
- ABS (Acrylonitrile Butadiene Styrene): ໃຊ້ເພື່ອເຮັດຊິ້ນສ່ວນລົດໃຫຍ່, ຂອງຫຼິິ້ນອຸປະກອນເອເລັກໂຕຣນິກ
ເມັດພາສຕິກມີບົດບາດສໍາຄັນໃນອຸດສາຫະກໍາການຜະລິດຈໍານວນຫຼາຍ ເພາະມັນສາມາດນຳມາປຸງແຕ່ງເປັນຜະລິດຕະພັນໄດ້ຫຼາກຫຼາຍຊະນິດ, ທົນທານ, ໃຊ້ງ່າຍ, ກັນນ້ຳ ແລະ ລາຄາບໍ່ແພງ. ເຖິງຢ່າງໃດກໍຕາມເມັດພາສຕິກແມ່ນວັດສະດຸທີ່ຍ່ອຍສະຫຼາຍໄດ້ຍາກ ມັນໃຊ້ເວລາຫຼາຍຮ້ອຍປີ. ດັ່ງນັ້ນ, ມັນຄວນຈະຖືກນໍາໃຊ້ຢ່າງມີສະຕິ. ຢ່າໃຊ້ພາສຕິກທີ່ໃຊ້ແລ້ວຖິ້ມເຮົາຄວນເລືອກທີ່ຈະໃຊ້ວັດສະດຸອື່ນແທນທຸກຄັ້ງທີ່ເປັນໄປໄດ້.