ສະພາການຄ້າ ແລະ ອຸດສາຫະກຳ ແຂວງສະຫວັນນະເຂດ ຮ່ວມກັບ ພະແນກແຮງງານ ແລະ ສະຫວັດດີການສັງຄົມແຂວງ, ພະແນກສຶກສາທິການ ແລະ ກິລາແຂວງ ເປີດຕະຫລາດນັດແຮງງານ ໃນວັນທີ 2 ພະຈິກ 2018 ຢູ່ສູນການຄ້າ ສະຫວັນ-ໄອເຕັກ ເພື່ອເປີດກວ້າງໃຫ້ບັນດາຫົວໜ່ວຍທຸລະກິດ, ຫ້າງ-ຮ້ານ ໄດ້ມາພົບປະແລກປ່ຽນຂໍ້ມູນ, ຄຳຄິດເຫັນ ແລະ ແລກປ່ຽນປະສົບການ, ໃຫ້ບັນດານັກສຶກສາ, ນັກຮຽນຮູ້, ປັນຍາຊົນ ໄດ້ຊອກຫາ ວຽກເຮັດງານທຳໃນປັດຈຸບັນ ເພື່ອຈະໄດ້ມີໂອກາດໄດ້ເຮັດວຽກຮ່ວມກັນໃນອານາຄົດ.
ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ມີຄຳເຫັນວ່າ: ງານຕະຫລາດນັດແຮງງານ ຖືວ່າມີຄວາມໝາຍ ຄວາມສຳຄັນ ຍ້ອນສະພາວະແຂວງພວກເຮົາພວມສຸມໃສ່ເຂົ້າສູ່ການພັດທະນາ, ການຫັນມາ ເປັນອຸດສາຫະກຳທີ່ທັນສະໄໝ ໃນຍຸກທີ່ມີການຮ່ວມມື ແລະ ເປີດກວ້າງສູ່ຕະຫລາດພາຍນອກ ແລະ ພາຍໃນ ທ່າມກາງກະແສສັງຄົມທີ່ມີຄວາມຕ້ອງການ ແລະ ມີວຽກເຮັດງານທຳ, ທັງເປັນໂອກາດທີ່ດີ ເພື່ອເຮັດໃຫ້ຜູ້ທີ່ຕ້ອງການວຽກເຮັດງານທຳ ໄດ້ມາພົບປະກັບບັນດາບໍລິສັດທີ່ຕ້ອງການແຮງງານ ເພື່ອບັນຈຸເຂົ້າໃນຕຳແໜ່ງງານຕ່າງໆ ຕາມຄວາມເໝາະສົມ.
ໃນງານຕະຫລາດນັດຄັ້ງນີ້, ຍັງໄດ້ມອບໃບຍ້ອງຍໍໃຫ້ກັບພາກສ່ວນນັກທຸລະກິດ, ຫ້າງຮ້ານ ແລະ ບໍລິສັດ ທີ່ໄດ້ປະກອບສ່ວນເຂົ້າໃນທຸກວຽກງານ ບໍ່ວ່າຈະເປັນການຊ່ວຍເຫລືອທຶນຮອນ ໃນກິດຈະກຳ ແລະ ວັນສຳຄັນຕ່າງໆ ແລະ ເປັນສ່ວນຊ່ວຍພັດທະນາແຂວງສະຫວັນນະເຂດຕື່ມອີກ.
Cr.KPL
#insidelaos