ຄະນະຊີ້ນຳ ການສ້າງຍຸດທະສາດ ແລະສູນສົ່ງເສີມການເຕີບໂຕສີຂຽວຂອງ ສປປ ລາວ ຈັດກອງປະຊຸມ ປືກສາຫາລືປະກອບຄຳຄິດເຫັນໃສ່ຮ່າງຍຸດທະຍາດ ການເຕີບໂຕສີຂຽວຂອງ ສປປ ລາວ ໂດຍມີ ທ່ານ ລີເບີ ບົວລີປາວ ຮອງຫົວໜ້າສະຖາບັນ ຄົ້ນຄວ້າເສດຖະກິດແຫ່ງຊາດ ແລະ ຮອງຫົວໜ້າຄະນະຊີ້ນຳ ການສ້າງຍຸດທະສາດ ເປັນປະທານ
ກອງປະຊຸມດັ່ງກ່າວ ໄດ້ຮັບຟັງ ການສະເໜີຮ່າງຍຸດທະສາດເຕີບໂຕສີຂຽວ ສະບັບປັບປຸງໃໝ່ ຮ່າງສະບັບທີ 3 ຈາກບັນດາຜູ້ຕ່າງໜ້າພາກສ່ວນຕ່າງໆ, ປະກອບຄຳຄິດຄຳເຫັນໃສ່ຮ່າງຍຸດທະສາດ ເຕີບໂຕສີຂຽວສະບັບປັບປຸງໃໝ່ ເພື່ອໃຫ້ຮ່າງຍຸດທະສາດສະບັບນີ້ ມີເນື້ອໃນຄົບຖ້ວນສົມບູນຂຶ້ນຍິ່ງຂຶ້ນ, ແທດເໝາະກັບຄວາມຮຽກຮ້ອງຕ້ອງການ ໃນຕົວຈິງຂອງການພັດທະນາເສດຖະກິດ-ສັງຄົມ.
ຍຸດທະສາດການເຕີບໂຕສີຂຽວສະບັບນີ້, ສ້າງຂຶ້ນເພື່ອຮັກສາລະດັບການຂະຫຍາຍຕົວ ຂອງເສດຖະກິດ ໃຫ້ສືບຕໍ່ຮັກສາຈັງວະ ມີການເຕີບໂຕທີ່ໝັ້ນທ່ຽງ ແລະຕໍ່ເນື່ອງ ໂດຍບໍ່ທຳລາຍສິ່ງແວດລ້ອມ ນັ້ນຄືຕ້ອງໄດ້ເລັ່ງໃສ່ຊຸກຍູ້ ແລະສົ່ງເສີມ ການຂະຫຍາຍຕົວຂອງເສດຖະກິດ ແລະ ຫຼຸດຜ່ອນຄວາມທຸກຍາກ ຢ່າງກວ້າງຂວາງ, ຍົກສູງປະສິດທິພາບ ແລະປະສິດທິຜົນ ຂອງການນຳໃຊ້ຊັບພະຍາກອນທຳມະຊາດ ທີ່ມີຢູ່ຢ່າງຈຳກັດຂອງປະເທດ ໃຫ້ເກີດຜົນປະໂຫຍດສູງສຸດ, ຂະຫຍາຍເສດຖະກິດທີ່ສະອາດ, ເປັນມິດຕໍ່ສິ່ງແວ້ດລ້ອມ, ຫຼຸດຜ່ອນສິ່ງເສດເຫຼືອ ແລະການປ່ອຍອາຍຜິດ ເຮືອນແກ້ວ, ເພີ່ມຄວາມທົນທານຂອງເສດຖະກິດ ຕໍ່ສະພາບການປ່ຽນແປງດິນຟ້າອາກາດ, ໄຟພິບັດທາງທຳມະຊາດ, ຄວາມຜັນຜວນຂອງສະພາບເສດຖະກິດໂລກ ແລະອື່ນໆ