ການແຂ່ງຂັນເຕັ້ນເຊຍລີດດິງ ຄອນເທດ ຄັ້ງທີ 8 ປະຈໍາປີ 2019 ຮອບຊີງຊະນະເລີດຊີງຂັນປະທານຄະນະກໍາມະການໂອແລມປິກແຫ່ງຊາດລາວ ໄດ້ຈັດຂຶ້ນທີ່ສູນການຄ້າໄອເຕັກມໍ (ຊັ້ນ 7) ນະຄອນຫຼວງວຽງຈັນ, ເປັນກຽດເຂົ້າຮ່ວມພິທີຂອງທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະກີລາ,ຮອງປະທານຄະນະກໍາມະການໂອແລມປິກແຫ່ງຊາດລາວ, ມີທ່ານ ຄໍາແສນ ສຸດທະວົງ ຫົວໜ້າຫ້ອງການຄຸ້ມຄອງນັກສຶກສາ ມະຫາວິທະຍາໄລແຫ່ງຊາດ,ມີຜູ້ຕາງໜ້າຈາກບໍລິສັດເບຍລາວ, ບັນດາແຂກທີ່ຖືກເຊີນ, ຄະນະກໍາມະການຕັດສິນ, ພະນັກງານ, ຄູ-ອາຈານ, ຄູຝຶກ ແລະຜູ້ເຂົ້າແຂ່ງຂັນ 18ທີມ ພ້ອມດ້ວຍກອງເຊຍແຕ່ລະທີມເຂົ້າຮ່ວມຢ່າງຄຶກຄື້ນ.
ກ່ອນເລີ່ມການແຂ່ງຂັນ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະກີລາ, ຮອງປະທານຄະນະກໍາມະການໂອແລມປິກແຫ່ງຊາດລາວກ່າວວ່າ:
ການແຂ່ງຂັນເຊຍລີດດິງ ຄອນເທດຄັ້ງທີ8 ປະຈໍາປີ 2019 ເປັນກິດຈະກໍາໜຶ່ງທີ່ມີຄວາມໝາຍສໍາຄັນ ແລະເປັນກິດຈະກໍາທີ່ສົ່ງເສີມ ສະໜັບສະໜູນໃຫ້ນັກຮຽນ-ນັກສຶກສາໄດ້ສະແດງຄວາມສາມາດຂອງຕົນເອງອອກສູ່ສາຍຕາມະຫາຊົນ
ພ້ອມທັງເປັນກິດຈະກໍາທີ່ພັດທະນາກີລາມວນຊົນທີ່ສອດຄ່ອງກັບ 3 ລັກສະນະ 5 ຫຼັກມູນຂອງການສຶກສາ ແລະຍຸດທະສາດຂອງການພັດທະນາກີລາລາວ, ເຮັດໃຫ້ນັບມື້ນັບກວ້າງຂວາງ ແລະຕິດພັນກັບການພັດທະນາຊັບພະຍາກອນມະນຸດ ສ້າງໃຫ້ນັກຮຽນ-ນັກສຶກສາມີຄວາມສາມາດກ້າສະແດງອອກໃນເວທີຕ່າງໆ ແລະມີຄວາມເສຍສະຫຼະ, ຮູ້ຈັກຊ່ວຍເຫຼືອເຊິ່ງກັນ ແລະກັນ ໃຫ້ມີຈິດໃຈກວ້າງຂວາງ ແລະສາມັກຄີກັນພາຍໃນຢ່າງເລິກເຊິ່ງ.
ການແຂ່ງຂັນເຕັ້ນເຊຍລີດດິງຄັ້ງນີ້ ໄດ້ຮັບການສະໜັບສະໜູນຈາກ ບໍລິສັດເບຍລາວ. ສໍາລັບປີນີ້ມີ 18ທີມ ຈາກສະຖາບັນການສຶກສາຈາກພາກລັດ ແລະເອກະຊົນເຂົ້າຮ່ວມແຂ່ງຂັນ.
ເຊິ່ງປະກອບມີ 2 ລາຍການ ການແຂ່ງຂັນຄື: ເຕັ້ນເຊຍແດ້ນ (ຮຸ່ນມັດທະຍົມປາຍ) ແລະເຕັ້ນຕໍ່ໂຕ (ຮຸ່ນວິທະຍາໄລ-ມະຫາວິທະຍາໄລ). ຜ່ານການແຂ່ງຂັນປະເພດເຕັ້ນຕໍ່ໂຕ (ຮຸ່ນວິທະຍາໄລ-ມະຫາວິທະຍາໄລ) ຊະນະເລີດໄດ້ແກ່ ວິທະຍາໄລຣັດຕະນະບໍລິຫານທຸລະກິດ ໄດ້ຮັບເງິນລາງວັນ 25 ລ້ານກີບ ພ້ອມຂັນລາງວັນ,
ຮອງຊະນະເລີດໄດ້ແກ່ສະຖາບັນການທະນາຄານ ໄດ້ຮັບເງິນລາງວັນ 18 ລ້ານກີບ ພ້ອມໂລ້ລາງວັນ, ທີ 3 ໄດ້ແກ່ທິມບຣີງ ໄດ້ຮັບເງິນລາງວັນ 14 ລ້ານກີບພ້ອມໂລ້ລາງວັນ ແລະທີ 4 ໄດ້ແກ່ ມະຫາວິທະຍາໄລແຫ່ງຊາດ ໄດ້ຮັບເງິນລາງວັນ 12 ລ້ານກີບ ພ້ອມໂລ້ລາງວັນ.
ສ່ວນປະເພດເຕັ້ນເຊຍແດ້ນ(ຮຸ່ນມັດທະຍົມປາຍ) ທີມທີ່ຊະນະເລີດໄດ້ແກ່ໂຮງຮຽນສອງພາສາລາວ-ຫວຽດນາມ ຫງວຽນຢູ ໄດ້ຮັບເງິນລາງວັນ 12ລ້ານກີບ ພ້ອມຂັນລາງວັນ, ຮອງຊະນະເລີດໄດ້ແກ່ທິມໂຮງຮຽນ ມສ. ສາລະຄໍາ ໄດ້ຮັບເງິນລາງວັນ 10ລ້ານກີບພ້ອມດ້ວຍໂລ້ລາງວັນ, ທີ 3 ໄດ້ແກ່ໂຮງຮຽນ ມສ. ວຽງຈັນ ໄດ້ຮັບເງິນລາງວັນ 8ລ້ານກີບພ້ອມໂລ້ລາງວັນ ແລະທີ 4 ໄດ້ແກ່ໂຮງຮຽນສິລະປະດົນຕີແຫ່ງຊາດ ໄດ້ຮັບເງິນລາງວັນ6ລ້ານກີບພ້ອມດ້ວຍໂລລາງວັນ.
ເຊິ່ງກອງເຊຍດີເດັ່ນປີນີ້ ໄດ້ແກ່ກອງເຊຍຈາກທີມໂຮງຮຽນມັດທະຍົມສຶກສາສົມບູນສາທິດ,ໂຮງຮຽນມັດທະຍົມສຶກສາສົມບູນພັນໝັ້ນ ແລະກອງເຊຍຈາກວິທະຍາໄລສິລະປະສຶກສາ ເຊິ່ງໄດ້ຮັບລາງວັນຜະລິດຕະພັນມິລິນດາ 20ແກັດ ຈາກບໍລິສັດເບຍລາວ.
ແຫຼ່ງຂໍ້ມູນ: ເວບໄຊ ມະຫາວິທະຍາໄລແຫ່ງຊາດ