ເຈົ້າໜ້າທີ່ກອງກວດກາປ່າໄມ້ ແຂວງສະຫວັນນະເຂດ ໄດ້ກວດຢຶດສັດປ່າ, ຊາກສັດປ່າ ພ້ອມດ້ວຍເຄື່ອງປ່າຂອງດົງ ຈຳນວນຫລາຍລາຍການ ແລະ ລົດກະບະ ຟອດແລນເຈີ້ (ສີຂາວ) ໝາຍເລກທະບຽນ 34G-14226, ເຊິ່ງຂັບຂີ່ໂດຍ ທ້າວ ຫງວຽນ ແທັງ ຈຸງ ເປັນຄົນສັນຊາດຫວຽດນາມ ໄດ້ຢູ່ບໍລິເວນທາງເລກ 9 (ເຂດເມືອງເຊໂປນ) ຕາມການສັນນິຖານເບື້ອງຕົ້ນ ເຄື່ອງດັ່ງກ່າວ ຄາດວ່າໄດ້ມີການເກັບຊື້ຢູ່ເຂດເມືອງພີນ.
ທ່ານ ສີພາວັນ ໄຊສີ ຮອງຫົວໜ້າກອງກວດກາປ່າໄມ້ ແຂວງສະຫວັນນະເຂດ ໄດ້ໃຫ້ສຳພາດຕໍ່ສື່ມວນຊົນວ່າ: ສັດປ່າ, ຊາກສັດປ່າ ແລະ ເຄື່ອງປ່າຂອງດົງທີ່ຢຶກໄດ້ໃ ນຄັ້ງນີ້ ປະກອບມີ ຂີ້ຊີ ຈຳນວນ 5 ສອບ, ນ້ຳໜັກ 197 ກິໂລ, ໜໍ່ໄມ້ແຫ້ງ ຈຳນວນ 1 ກະສອບ, ໜັກ 8 ກິໂລ, ດອກເຜິ້ງ 1 ກະສອບ, ໜັກ 5 ກິໂລ. ນອກນັ້ນ ຍັງມີຊາກໝູປ່າ 1 ໂຕ, ໜັກ 35 ກິໂລ, ເໝັ້ນ 1 ໂຕ, ໜັກ 10 ກິໂລ, ເຫງັນ 2 ໂຕ, ໜັກ 10 ກິໂລ ແລະ ຍັງມີສັດທີ່ຍັງມີຊີວິດຄື: ເຫງັນ 3 ໂຕ, ໜັກ 9 ກິໂລ, ງູສິງ 2 ຖົງ, ໜັກ 13 ກິໂລ, ເຕົ່າ 1 ໂຕ ແລະ ແລນ 1 ໂຕ.
ທ່ານ ສີພາວັນ ໄຊສີ ຍັງໃຫ້ຮູ້ອີກວ່າ: ຕາມສອບຖາມຄົນຂັບລົດຄັນດັ່ງກ່າວບອກວ່າ ສັດຈຳນວນດັ່ງກ່າວ ແມ່ນມີຄົນຝາກໄປປະເທດຫວຽດນາມ ໂດຍທີ່ເຈົ້າຂອງລົດບໍ່ຮູ້ວ່າແມ່ນຫຍັງ ແຕ່ເຈົ້າໜ້າທີ່ຍັງບໍ່ທັນເຊື່ອຄຳໃຫ້ການຂອງຜູ້ກ່ຽວ ແລະ ຍັງຈະຊອກຫາຕົ້ນຕໍເຈົ້າຂອງເຄື່ອງດັ່ງກ່າວ ເພື່ອມາດຳເນີນຄະດີຕາມລະບຽບກົດໝາຍ.
ຮູບພາບ: www.matichon.co.th
Cr.KPL