ບໍລິສັດ ເບຍລາວ ຈຳກັດ ໄດ້ມອບເງິນປະກອບສ່ວນໃນການ ສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ໃຫ້ກັບນະຄອນຫຼວງວຽງຈັນ ຈຳນວນ 500 ລ້ານກີບ. ໂດຍການມອບຂອງ ທ່ານ ເຮັນຣິກ ແອນເດີເຊັນ ຜູ້ອຳນວຍການບໍລິສັດ ເບຍລາວ ຈໍາກັດ ແລະ ຮັບໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ
ນອກຈາກນີ້ແລ້ວ, ບໍລິສັດ ເບຍລາວ ຈຳກັດ ຍັງໄດ້ປະກອບສ່ວນເງິນຊ່ວຍເຫຼືອ ໃຫ້ກັບບັນດາແຂວງຕ່າງໆໃນທົ່ວປະເທດອີກ ແຂວງລະ 100 ລ້ານກີບ
ທັງນີ້, ເງິນຈຳນວນດັ່ງກ່າວ ແມ່ນມີຈຸດປະສົງເພື່ອຮັບໃຊ້ໃນວຽກງານສະກັດກັ້ນ ແລະ ຕ້ານການລະບາດຂອງພະຍາດໂຄວິດ-19 ໃນ ສປປ ລາວ ທີ່ກຳລັງມີຈຳນວນຜູ້ຕິດເຊື້ອເພີ່ມຂຶ້ນເປັນຈຳນວນຫຼາຍ
ແລະ ໃນປີ 2020 ທີ່ຜ່ານມາ, ບໍລິສັດ ເບຍລາວ ຈຳກັດ ກໍ່ຍັງໄດ້ປະກອບສ່ວນຊ່ວຍເຫຼືອແກ່ວຽກງານການສະກັດກັ້ນ ແລະ ຕ້ານການລະບາດຂອງພະຍາດໂຄວິດ-19 ໃນລາວ ເປັນຈໍານວນ 2 ຕື້ກີບ
ນັບຕັ້ງແຕ່ເລີ່ມມີການລະບາດຂອງພະຍາດໂຄວິດ-19 ໃນ ສປປ ລາວຂອງພວກເຮົາ, ບໍລິສັດ ເບຍລາວ ກໍ່ໄດ້ປະກອບສ່ວນໃນການຕ້ານພະຍາດດັ່ງກ່າວນີ້ ເປັນຈໍານວນ 2,5 ຕື້ (2020-2021)