ບໍລິສັດ ສະຫວັນ ບໍລິການຈັດຫາງານ ຈຳກັດ ໄດ້ສົ່ງເງິນຄືນໃຫ້ກັບຜູ້ທີ່ໄດ້ລົງທະບຽນມັດຈຳໄວ້ ເພື່ອທີ່ຈະໄປເຮັດວຽກຕາມລະດູການຂະແໜງກະສິກຳ ຢູ່ ສ.ເກົາຫຼີ ໃນວັນທີ 22-30 ກັນຍາ 2022 ຍ້ອນສາເຫດທີ່ບັນຫາການໂຕນໜີ ຂອງແຮງງານ ຢູ່ ສ.ເກົາຫລີ ຈຶ່ງໄດ້ໂຈະການຈັດສົ່ງແຮງງານໄປເຮັດວຽກລະດູການ, ພ້ອມນີ້ກໍເນື່ອງຈາກໝົດລະດູການທຳການຜະລິດກະສິກຳ ເລີຍໄດ້ເລື່ອນການຈັດສົ່ງແຮງງານໄປເຮັດວຽກຕາມລະດູການອອກໄປ ເຮັດໃຫ້ຫຼາຍຄົນທີ່ບໍ່ໄດ້ໄປເຮັດວຽກ ມາເອົາເງຶນມັດຈຳຄືນ.
ຍ້ອນສາເຫດນັ້ນ ເຮັດໃຫ້ມີຜູ້ສະໝັກຈຳນວນໜຶ່ງໄດ້ມາຮຽກຮ້ອງຕໍ່ວ່າບໍລິສັດສະຫວັນບໍລິການ ຈັດຫາງານ ເນື່ອງຈາກວ່າ ລົງທະບຽນແລ້ວ ບໍ່ມີລາຍຊື່ອອກໄປເຮັດວຽກ ແລະ ຢາກມາຂໍຖອນເງີນຄືນ, ອັນໄດ້ສ້າງຄວາມສັບສົນໃຫ້ກັບຫຼາຍໆຄົນທີ່ລົງທະບຽນໄປກ່ອນໜ້ານັ້ນ ແລະ ຕໍ່ກັບປະເດັນດັ່ງກ່າວ, ທາງກະຊວງແຮງງານ ແລະ ສະຫວັດດີການສັງຄົມ ກໍໄດ້ອະທິບາຍເພີ່ມເຕີມກ່ຽວກັບ ເງື່ອນໄຂຂອງການລົງທະບຽນສະໝັກໄປເຮັດວຽກຕາມລະດູການ ຢູ່ ສ.ເກົາຫຼີ ລວມທັງລະບຽບໃນການຈັດສົ່ງ, ພ້ອມທັງ ຊີ້ແຈງບາງເງື່ອນໄຂຄວາມຕ້ອງການທີ່ຕະຫຼາດແຮງງານຂອງ ສ.ເກົາຫຼີ ຮັບແຮງງານຈາກ ສປປ ລາວ.
ດັ່ງນັ້ນ ຜູ້ທີ່ລົງທະບຽນກ່ອນແລ້ວ ຫາກມີຄວາມຕ້ອງການເງິນຄືນ ແມ່ນໃຫ້ມາລົງທະບຽນກັບໜ່ວຍງານທີ່ກ່ຽວຂ້ອງ ແລະ ພາຍຫຼັງສັງລວມໄດ້ແລ້ວ ແມ່ນຈະແຈ້ງໃຫ້ຜູ້ລົງທະບຽນມາຮັບເງິນຄືນ.
ປະຈຸບັນມີຜູ້ມາຖອນເງິນລວມທັງຫມົດ 260 ຄົນ ຮອດວັນທີ 28 ກັນຍາ 2022 ຖອນໄປແລ້ວ 260 ຄົນ ແລະ ຍັງຈຳນວນ 60 ຄົນ ແມ່ນບໍ່ຕ້ອງການຖອນຈະລໍຖ້າການຈັດສົ່ງໄປເຮັດວຽກໃນລະດູການໜ້າ.
ສຳລັບທ່ານໃດທີ່ຕ້ອງການທີ່ຈະໄປເຮັດວຽກຕາມລະດູການຢູ່ ສ.ເກົາຫລີ ກໍສາມາດມາລົງທະບຽນຄືນໃຫມ່ ກັບກົມການຈັດຫາງານ, ກະຊວງ ແຮງງານ ແລະ ສະຫວັດດີການສັງຄົມ ແລະ ບໍລິສັດຈັດຫາງານ ທີ່ທາງກະຊວງກຳນົດເທົ່ານັ້ນໃນໂມງລັດຖະການ.