ຊົມເຊີຍ! ນັກທຸລະກິດ ຄົນທຳອິດຂອງ ສປປ ລາວ ທີ່ໄດ້ຮັບຫຼຽນນາມມະຍົດວິລະຊົນແຮງງານແຫ່ງຊາດລາວ ຊຶ່ງເປັນນາມມະຍົດສູງສຸດ ທັງເປັນຫຼຽນປະຫວັດສາດ ທີ່ພັກ-ລັດຖະບານແຫ່ງ ສປປ ລາວ ໄດ້ມອບໃຫ້ ທ່ານ ເກຍ ອູ໊ສິດທິເດດ ນັກພັດທະນາດີເດັ່ນແຫ່ງຊາດ ເຊິ່ງລາວແມ່ນເຈົ້າຂອງໂຮງງານນໍ້າດື່ມ ແລະ ນ້ຳກ້ອນໂລມາຄໍາ ແຂວງສະຫວັນນະເຂດ ທີ່ມີຜົນງານດີເດັ່ນ ໃນການມີສ່ວນຮ່ວມຊ່ວຍເຫຼືອປະຊາຊົນ 2 ໂຄງການ.
ທ່ານ ເກຍ ອູ໊ສິດທິເດດ ໄດ້ໃຫ້ຮູ້ວ່າ ການສະສົມຜົນງງານຕະຫຼອດໄລຍະຜ່ານມາ ເປັນຕົ້ນແມ່ນທຸລະກິດຂອງຕົນເອງ ຈາກທຸລະກິດນ້ອຍໆ ກໍຄ່ອຍໆຂະຫຍາຍຕົວຂຶ້ນມາ ຈາກຜົນງານພາຍໃນຄອບຄົວ ກໍຂະຫຍາຍສູ່ສັງຄົມ, ສາມາດປະກອບສ່ວນເຂົ້າໃນນະໂຍບາຍຂອງພັກ-ລັດວາງອອກ, ເຮັດຕາມເງື່ອນໄຂ ແລະ ທ່າແຮງທີ່ຕົນມີໃນແຕ່ລະໄລຍະ.
ໄດ້ປະກອບສ່ວນເຂົ້າໃນການຊ່ວຍເຫຼືອປະຊາຊົນທີ່ທຸກຍາກໃນ 2 ໂຄງການປະກອບມິ ການລຶບລ້າງຄວາມທຸກຍາກຂອງປະຊາຊົນ ບ້ານຄໍາປ່າແໜ ເມືອງຊົນນະບູລີ, ບ້ານປ່າກ້ວຍ ເມືອງຈໍາພອນ ແລະ ໂຄງການຮ່ວມໃຈສາຍໄຍໂລມາຄຳ ເພື່ອສ້າງພື້ນຖານໂຄງລ່າງທີ່ຈຳເປັນໃຫ້ກັບປະຊາຊົນ, ຈັດຫາແຫລ່ງນໍ້າດື່ມ-ນໍ້າໃຊ້ ແລະ ສົ່ງເສີມການສ້າງເສດຖະກິດຄອບຄົວ ຂອງປະຊາຊົນຢູ່ ບ້ານຕະຢົງ ແລະ ບ້ານປະແນະ ເຂດຈຸດສຸມຕັງອາໄລ-ລະແບງ ເມືອງນອງປະກອບສ່ວນເຮັດໃຫ້ ປະຊາຊົນບ້ານເປົ້າໝາຍ ມີຊີວິດການເປັນຢູ່ດີຂຶ້ນ.
ໃນໂຄງການລຶບລ້າງຄວາມທຸກຍາກຢູ່ບ້ານຄຳປ່າແໜ ແລະ ບ້ານປ່າກ້ວຍ ເປົ້າໝາຍຂອງໂຄງການກໍເພື່ອຫັນປ່ຽນການດຳລົງຊີວິດຂອງປະຊາຊົນຄອບຄົວເປົ້າໝາຍທີ່ເລື່ອນລອຍ (ຂໍທານ) ເປັນອາຊີບຫາກິນໃຫ້ຫັນປ່ຽນມາເປັນການອອກແຮງງານເຮັດກິນຢູ່ກັບທີ່ ໂດຍສ້າງພື້ນຖານການຜະລິດໃຫ້ແກ່ປະຊາຊົນ.
ສໍາລັບໂຄງການທີສອງແມ່ນ ຮ່ວມໃຈສາຍໄຍໂລມາຄໍາ ເປັນໂຄງການມີສ່ວນຮ່ວມລະຫວ່າງ ນັກທຸລະກິດ, ພາກລັດ ແລະ ພາກປະຊາຊົນ ເພື່ອໃຫ້ການຊ່ວຍເຫຼືອ ປະຊາຊົນ 2 ບ້ານ ໂດຍອີງໃສ່ພື້ນຖານ,ທ່າແຮງທີ່ປະຊາຊົນມີຢູ່ ເປົ້າໝາຍແນໃສ່ການສ້າງພື້ນຖານໂຄງລ່າງທີ່ຈຳເປັນໃຫ້ກັບປະຊາຊົນເພື່ອຈັດຫາແຫຼ່ງນໍ້າດື່ມ, ນໍ້າໃຊ້, ປະກອບມີ 138 ຄອບຄົວ ເພື່ອຊຸກຍູ້ສົ່ງເສີມການສ້າງເສດຖະກິດຄອບຄົວໃຫ້ກັບປະຊາຊົນໄດ້ມີແຫຼ່ງອາຫານແຫຼ່ງລາຍຮັບ ເພື່ອກຸ້ມຢູ່ກຸ້ມກິນ ແລະ ສ້າງຄວາມເຂັ້ມແຂງດ້ວຍຕົນເອງແບບຍືນຍົງ.
ຂໍ້ມູນຈາກ: ວິທະຍຸກະຈາຍສຽງ ແຂວງສະຫວັນນະເຂດ