ບຸນປີໃໝ່ລາວຖືເປັນອີກເທດສະການໜຶ່ງ ທີ່ແມ່ຄ້າພໍ່ຄ້າໃຫ້ຄວາມສົນໃຈ ແລະ ໄດ້ກະກຽມເຄື່ອງຂາຍໃຫ້ຫຼາຍຂຶ້ນກວ່າມື້ທຳມະດາ ເພາະຖືເປັນຊ່ວງທີ່ແຕ່ລະຫ້ອງການ, ແຕ່ລະຄອບຄົວ ແລະ ໝູ່ເພື່ອນໄດ້ສ້າງກິດຈະກຳ ຫຼື ມີການຊຸມແຊວບໍ່ວ່າຈະເປັນງານລ້ຽງຫ້ອງການ, ງານລ້ຽງອວຍພອນຜູ້ເຖົ້າຜູ້ແກ່, ຜູ້ໃຫຍ່ທີ່ເຄົາລົບ ຈຶ່ງເຮັດໃຫ້ໄດ້ຂາຍເຄື່ອງດີຂຶ້ນ ເຊິ່ງເປັນມື້ບຸນທີ່ບໍ່ຄ້າແມ່ຄ້າຈະບໍ່ຄ່ອຍພັກ ຫຼື ຢຸດຂາຍໃນຊ່ວງນີ້.
ຈາກການສອບຖາມພໍ່ຄ້າແມ່ຄ້າຈຳນວນໜຶ່ງ ຢູ່ຕະຫຼາດພະຂາວ ໄດ້ໃຫ້ຮູ້ວ່າ:
ນາງ ຫຼ້າ ແມ່ຄ້າຂາຍຜັກຢູ່ຕະຫຼາດພະຂາວເວົ້າວ່າ: ອາຊີບແມ່ຄ້າເປັນອາຊີບທີ່ບໍ່ຄ່ອຍຈະໄດ້ພັກ ບໍ່ວ່າຈະເປັນເທດສະການນ້ອຍຫຼືໃຫຍ່ກໍຕາມ ດັ່ງບຸນປີໃໝ່ຂອງທຸກໆປີກໍຈະບໍ່ພັກເພາະເປັນຊ່ວງທີ່ໄດ້ຂາຍເຄື່ອງດີ ຄົນທີ່ເຮັດອາຊີບອື່ນສ່ວນຫຼາຍກໍຈະຫາເວລາພັກບຸນເພື່ອສ້າງສັນກັນ, ກິນຊຸບແຊວກັນຢູ່ແລ້ວ ຖ້າເຮົາບໍ່ຂາຍໃນຊ່ວງນີ້ ກໍຖືເປັນການພາດໂອກາດຫາລາຍໄດ້ຂອງເຮົາ.
ຖ້າຖາມວ່າຢາກພັກຫຼືຢາກຊຸມແຊວກັບຄອບຄົວຫຼືໝູ່ຄູບໍ່? ກໍຢາກພັກຄືກັນແຕ່ເຮົາກໍຈະໃຊ້ເວລາທີ່ເຮົາຂາຍເຄື່ອງແລ້ວ ກັບໄປສ້າງສັນກັບຄອບຄົວ ແລະ ໝູ່ຄູ່, ອີກຢ່າງໜຶ່ງເຖິງວ່າເຮົາຂາຍເຄື່ອງ ແຕ່ເຮົາກໍຍັງສາມາດສ້າງສັນໃນກຸ່ມພໍ່ຄ້າແມ່ຄ້າໄດ້ເຊັ່ນດຽວກັນ.
ສ່ວນທ້າວ ຄຳຫຼ້າ ພໍ່ຄ້າຂາຍປາຢູ່ຕະຫຼາດພະຂາວເວົ້າວ່າ: ເປັນທຳມະດາຂອງທຸກໆປີຢູ່ແລ້ວ ທີ່ປີໃໝ່ແຕ່ເຮົາຍັງຕ້ອງໄດ້ມາຂາຍເຄື່ອງເປັນປົກກະຕິ ຖ້າບໍ່ມາຂາຍກໍບໍ່ໄດ້ເງິນປີໃໝ່ ແຕ່ເຖິງວ່າເຮົາຈະມາຂາຍເຄື່ອງທຸກປີ ແຕ່ເຮົາກໍສ້າງສັນທຸກໆປີ ເພາະເຮົາກໍສ້າງສັນກັບໝູ່ຄູ່ຂາຍເຄື່ອງນຳກັນ ມັນກໍເປັນການສ້າງສັນໃນມື້ບຸນປີໃໝ່່ອີກແບບໜຶ່ງ ແລະ ເປັນການສ້າງມິດສຳພັນທີ່ດີໃນກຸ່ມພໍ່ຄ້າແມ່ຄ້າຄືກັນ. ບໍ່ວ່າຈະເຮັດອາຊີບໃດກໍຕາມ ການສ້າງກິດຈະກຳໃນມື້ບຸນກໍມີຄວາມແຕກຕ່າງກັນໄປ ຂອງແຕ່ລະຄົນ ແຕ່ລະສາຍອາຊີບ ວ່າຈະສ້າງຄວາມສຸກ ແລະ ມິດທີ່ດີໃນຮູບແບບໃດ ດັ່ງພໍ່ຄ້າແມ່ຄ້າ ເຖິງວ່າຈະບໍ່ຢຸດຂາຍເຄື່ອງ ແຕ່ກໍຍັງສະຫຼອງບຸນປີໃໝ່ລາວໄດ້ຢ່າງມີຄວາມສຸກ ໃນຮູບແບບສາຍອາຊີບຂອງຕົນເອງ.