ເມື່ອນຶກເຖິງອາກາດຮ້ອນ ທຸກຄົນກໍຄົງຕ້ອງການຫາຫຍັງທີ່ສເຮັດໃຫ້ເຮົາເຢັນສະບາຍຫຼາຍຂຶ້ນ ບໍ່ວ່າຈະເຂົ້າໄປນັ່ງໃນຫ້ອງແອ, ເປີດພັດລົມ ແລະ ໜຶ່ງໃນນັ້ນ ກໍຄື ການລົງໄປຫຼິ້ນນ້ຳ ເຊິ່ງສຳລັບການຫຼິ້ນນ້ຳ ເປັນກິດຈະກຳໜຶ່ງທີ່ໜ້າສົ່ງເສີມ ເພາະການຫຼິ້ນນ້ຳນອກຈາກຈະເຮັດໃຫ້ຜ່ອນຄາຍຄວາມຮ້ອນໄດ້ແລ້ວ ຍັງເປັນການອອກກຳລັງທີ່ຊ່ວຍໃຫ້ຮ່າງກາຍແຂງແຮງ ແຕ່ການເຮັດອັນໃດທີ່ຫຼາຍເກີນໄປກໍຍັງມີຂໍ້ເສຍຢູ່ຄື: ການຫຼິ້ນນ້ຳເປັນເວລາດົນໆ ອາດເຮັດໃຫ້ເກີດຜົນເສຍໄດ້ຫຼາຍຢ່າງ ດັ່ງນີ້:
- ຖ້າຫຼິ້ນນ້ຳຢູ່ສະລອບນ້ຳສ່ວນໂຕກໍຄົງບໍ່ມີຜົນກະທົບຫຍັງ ແຕ່ຖ້າຫຼິ້ນນ້ຳຢູ່ສະລອຍນ້ຳແລ້ວສາທາລະນະ ຄໍຣີນທີ່ຜະສົມຢູ່ກັບນ້ຳພາຍໃນສະເພື່ອຂ້າເຊື້ອໂຣກ ເປັນສານເຄມີທີ່ມີລິດເຮັດໃຫ້ລະຄາຍເຄືອງ ຖ້າເຮົາມືນຕາຢູ່ໃນນ້ຳເປັນເວລາດົນໆ ຈະເຮັດໃຫ້ເກີດອາການຕາແດງໄດ້ ດັ່ງນັ້ນ, ເວລາຫຼິ້ນນ້ຳຈຶ່ງບໍ່ຄວນມືນຕາໃນນ້ຳ ແຕ່ສຳລັບຄົນທີ່ມັກມຸດນ້ຳ ຄວນໃສ່ແວ່ນຕາກັນນ້ຳ ເພື່ອທີ່ຈະຊ່ວຍປ້ອງກັນນ້ຳເຂົ້າຕາໄດ້.
- ສ່ຽງເປັນໂຣກມະເຮັງ ເນື່ອງຈາກໃນສະລອຍນ້ຳ ມີມີເຫື່ອ ແລະ ປັດສະວະ (ຍ່ຽວ) ຈາກຜູ້ທີ່ລົງໄປຫຼິ້ນນ້ຳ ໂດຍສະເພາະສະລອຍນ້ຳທີ່ມີຄົນຫຼິ້ນເປັນຈຳນວນຫຼາຍ ແນ່ນອນວ່າຈະເປັນແຫຼ່ງລວມຂອງເຊື້ອໂຣກ ທີ່ອາດກໍ່ໃຫ້ເກີດຄວາມສ່ຽງຂອງໂຣກມະເຮັງໃນກະເພາະປັດສະວະໄດ້.
- ອາການຖອກທ້ອງ ເນື່ອງຈາກໃນສະລອຍນ້ຳຂອງສະຖານທີ່ສາທາລະນະ ອາດມີເຊື້ອໂຣກຢູ່ຈຳນວນຫຼວງຫຼາຍ ສຳລັບຜູ້ທີ່ລອຍນ້ຳມີໂອກາດສູງຫຼາຍທີ່ຈະກືນນ້ຳເຂົ້າໄປໃນປະລິມານທີ່ຫຼາຍ ກໍອາດເຮັດໃຫ້ເກີດອາການຖອກທ້ອງໄດ້ເຊັ່ນກັນ.
- ຜິວໜັງ, ຕາ, ຫູ ແລະ ດັງ ຕິດເຊື້ອ ເພາະໃນສະລອຍນ້ຳສາທາລະນະ ອາດມີເຊື້ອໂຣກທີ່ສາມາດເຮັດໃຫ້ ຕາແດງ, ຫູອັກເສບ, ດັງອັກເສບ ຫຼື ຕິດເຊື້ອໃນທາງເດີນຫາຍໃຈ ແລະ ອາດເປັນໂຣກຜິວໜັງໄດ້ ຖ້າຫາກທ່ານມີບາດແຜຕາມສ່ວນຕ່າງໆ ຂອງຮ່າງກາຍ ເຊັ່ນ: ບາດແຜບໍລິເວນຜິວໜັງ ກໍຄວນຫຼີກຫຼ່ຽງການລົງສະລອຍນ້ຳສາທາລະນະ ເພື່ອປ້ອງກັນການຕິດເຊື້ອ ຈຶ່ງຈະດີກວ່າ.