ໃນເວລາທີ່ພວກເຮົາຮຽນຮູ້ພາສາແມ່ຂອງພວກເຮົາ ເຮົາເລີ່ມຕົ້ນດ້ວຍການຟັງ ແລ້ວຈຶ່ງເວົ້າ, ຈາກນັ້ນຈຶ່ງອ່ານ ແລະ ສຸດທ້າຍຈຶ່ງຂຽນ, ການຟັງ ເວົ້າ ອ່ານ ແລະ ຂຽນ ແມ່ນທັກສະ 4 ຢ່າງທີ່ເຮົາຕ້ອງພັດທະນາເພື່ອຈະສື່ສານໄດ້ຢ່າງຄົບຖ້ວນ. ການຟັງ ແລະ ການອ່ານແມ່ນທັກສະການຮັບສານ ຄືການຮັບຂໍ້ມູນກ່ຽວກັບພາສາທີ່ໃຊ້ໃນຊີວິດຈິງເຂົ້າມາ ສ່ວນການເວົ້າ ແລະ ການຂຽນແມ່ນທັກສະສໍາລັບການສົ່ງສານ ຄືການຜະລິດພາສາອອກໄປເປັນໜຶ່ງໃນຂະບວນການຂອງການຮຽນຮູ້ພາສາທີສອງ.
ປະຕິເສດບໍ່ໄດ້ວ່າ ທຸກວັນນີ້ການເຮັດວຽກຕ້ອງໃຊ້ທັກສະທາງດ້ານພາສາ ບໍ່ວ່າຈະເປັນພາສາອັງກິດ, ພາສາຈີນ, ຫວຽດນາມ ຫຼືພາສາອື່ນໆ ຖ້າເຮົາຮູ້ເຮົາກໍຈະໄດ້ປຽບໃນການເຮັດວຽກງານ ເຊິ່ງຖ້າທ່ານຕ້ອງການພັດທະນາທັກສະດ້ານພາສາ ເຮົາຈໍາເປັນຕ້ອງເອົາຕົວເອງໄປຢູ່ໃນສະພາບແວດລ້ອມທີ່ເວົ້າພາສານັ້ນໆ ໃຊ້ພາສາທີ່ສອງເປັນສ່ວນໜຶ່ງຂອງຊີວິດຂອງເຮົາ ບໍ່ວ່າຈະຢູ່ເຮືອນ ຢູ່ບ່ອນເຮັດວຽກ ຫຼື ເວລາຫວ່າງກໍຕາມ. ມື້ນີ້ພວກເຮົາຈະແບ່ງປັນວິທີທີ່ຈະເຮັດໃຫ້ເຮົາສາມາດພັດທະນາທັກສະໃນການສື່ສານພາສາອື່ນໆ.
ໃຊ້ພາສາໃຫ້ຫຼາຍທີ່ສຸດທີ່ຈະເຮັດໄດ້ ແຮງຝຶກແຮງເກັ່ງ ໝາຍຄວາມວ່າ ຖ້າຢາກພັດທະນາທັກສະພາສາ ຕ້ອງໄດ້ຝຶກຝົນ ຫາກເຮົາຫາກໍເລີ່ມແຮງພາສາລະດັບຕົ້ນ ຕ້ແງຝຶກທັງ 4 ທັງກສະໄດ້ແກ່ ການຟັງ ເວົ້າ, ອ່ານ ແລະ ຂຽນ.
ການຟັງ
ທັກສະການຟັງມີບົດບາດສຳຄັນບໍ່ວ່າພາສາໃດກໍ່ຕາມທີ່ເຈົ້າກຳລັງຮຽນຢູ່ ການຟັງຢ່າງມີປະສິດທິພາບຊ່ວຍໃຫ້ພວກເຮົາເຂົ້າໃຈ ແລະ ເຮັດໃຫ້ພວກເຮົາເວົ້າໄດ້ດີຂຶ້ນ. ພວກເຮົາສາມາດພັດທະນາທັກສະການຟັງໄດ້ແນວໃດ? ພະຍາຍາມຟັງຢ່າງລະມັດລະວັງ ບໍ່ແມ່ນພຽງແຕ່ຟັງສິ່ງທີ່ກໍາລັງເວົ້າ ແຕ່ຟັງວ່າມັນເວົ້າແນວໃດດັ່ງນັ້ນຄວນຟັງສື່ດັ່ງນີ້:
- ຟັງເພງ ບໍ່ວ່າຈະເກົ່າຫຼືໃໝ່ສາມາດເລືອກຟັງຕາມທີ່ທ່ານຕ້ອງການ ແຕ່ລອງຟັງເນື້ອເພງໃຫ້ລະອຽດ (ບາງຄັ້ງການອ່ານເນື້ອເພງຊ່ວຍໃຫ້ທ່ານເຂົ້າໃຈເພງໄດ້ດີກວ່າ)
- ເບິ່ງຮູບເງົາ, ລາຍການໂທລະພາບ, ຂ່າວ, ລາຍການບັນເທີງ ແລະ ວິທະຍຸ ລອງເລືອກຮູບເງົາຄລາສສິກເບິ່ງ ແລ້ວເປີດຊັບໄຕເຕິ້ນ ເຮົາຈຶ່ງຮູ້ສຶກຄຸ້ນເຄີຍກັບພາສາ.
ການເວົ້າ
ເປັນທັກສະທີ່ຍາກທີ່ສຸດໃນບັນດາສີ່ທັກສະ ແຕ່ທັນທີທີ່ທ່ານເລີ່ມເວົ້າເລັກນ້ອຍ, ມີຫຼາຍວິທີທີ່ຈະຊ່ວຍໃຫ້ທ່ານສາມາດເກັ່ງພາສາໄວຂຶ້ນເຊັ່ນ:
- ລອງໂທລົມກັນ: ເທັກໂນໂລຍີຍຸກນີ້ພັດທະນາໄປໄກຫຼາຍ ໂດຍສະເພາະສື່ສັງຄົມອອນລາຍ ແລະ ເຄືອຂ່າຍ ດັ່ງນັ້ນບໍ່ວ່າເຈົ້າຈະຢູ່ໃສກໍຕາມ ເຈົ້າຈະພົບເຫັນຫ້ອງສົນທະນາໃຫ້ເຂົ້ມໄປເພື່ອສົນທະນາ.
- ເວົ້າ ແລະ ບັນທຶກສຽງຕົວເອງ: ມັນອາດຈະເປັນເລື່ອງຕະຫຼົກແຕ່ມັນຈະຊ່ວຍໃຫ້ທ່ານຮູ້ວ່າການເຮັດຊ້ໍາ ແລະ ບັນທຶກສຽງຂອງເຈົ້າຫຼາຍຄັ້ງຈົນກ່ວາເຈົ້າພໍໃຈສາມາດປັບປຸງການປະຕິບັດຂອງເຈົ້າໄດ້ຢ່າງຫຼວງຫຼາຍ.
- ສົນທະນາກັບຫມູ່ເພື່ອນ: ເປັນພາສາອື່ນໆນອກຫ້ອງຮຽນ ຫຼື ເຕົ້າໂຮມກັນເພື່ອຫຼິ້ນເກມ ກິນເຂົ້ານຳກັນ ຫຼືທ່ານພຽງແຕ່ສາມາດນັ່ງແລະສົນທະນາກໍໄດ້.
ການອ່ານ
ເປັນຂະບວນການຂອງສະໝອງແລະໃຊ້ເວລາໃນການພັດທະນາ ເຮົາຈໍາເປັນຕ້ອງເຂົ້າໃຈໄວຍະກອນ ຫຼືໂຄງສ້າງປະໂຫຍກທີ່ໃຊ້ໃນບົດຄວາມນັ້ນເພື່ອອ່ານ ແລະ ເຂົ້າໃຈມັນ. ສຳລັບວິທີພັດທະນາທັກສະການອ່ານທີ່ດີຄື
- ອ່ານປຶ້ມ ແລະ ບົດຄວາມພາສາຕ່າງປະເທດ: ພະຍາຍາມເລີ່ມຕົ້ນດ້ວຍປຶ້ມແບບງ່າຍໆ, ອາດຈະເປັນປື້ມເດັກນ້ອຍຫຼືກາຕູນ ພາບປະກອບຈະຊ່ວຍໃຫ້ທ່ານເຂົ້າໃຈເຖິງວ່າເຈົ້າບໍ່ຮູ້ຄຳສັບ.
- ປ່ຽນພາສາທີ່ໃຊ້: ໃນໂທລະສັບ ຄອມພິວເຕີ ຫຼືແທັບເລັດໃນພາສາອັງອື່ນ.
ການຂຽນ
ເຖິງແມ່ນວ່າທັກສະການຂຽນເປັນສິ່ງທີ່ຫຼາຍຄົນຢ້ານ, ແຕ່ທຸກຄົນສາມາດຂຽນໄດ້ດີຖ້າພວກເຂົາມີລະບຽບວິໄນ ແລະ ຄວາມຕັ້ງໃຈໃນການສຶກສາ
- ຂຽນຄໍາເວົ້າ ຫຼື ສໍານວນ: ທີ່ທ່ານຄິດວ່າເປັນປະໂຫຍດໂດຍການຂຽນຄວາມໝາຍ ແລະ ຕົວຢ່າງ ມັນດີກວ່າທີ່ຈະຈື່ຈໍາປະໂຫຍກກ່ວາຈື່ຄໍາສັບຕ່າງໆ. ທ່ານສາມາດຂຽນມັນໃນປຶ້ມບັນທຶກໄດ້.
ສະຫຼຸບແລ້ວບໍ່ວ່າພາສາໃດກໍ່ຕາມຈະໃຊ້ພາສາແມ່ເປັນກຸນແຈເພື່ອກາຍເປັນຄົນເກັ່ງໃນພາສາຕ່າງປະເທດ ເຊິ່ງຈຳເປັນຕ້ອງຝຶກຝົນໃຫ້ຫຼາຍ ແລະ ເລື້ອຍໆເທົ່າທີ່ເຈົ້າເຮັດໄດ້.