ທ່ານ ປອ. ສຸພັນ ແກ້ວມີໄຊ, ລັດຖະມົນຕີ ກະຊວງ ແຜນການ ແລະ ການລົງທຶນກ່າວໃນກອງປະຊຸມປັບປຸງຄວາມສະດວກໃນການດຳເນີນທຸລະກິດ ແລະ ການລົງທຶນ ໄດ້ຈັດຂຶ້ນໃນຫວ່າງບໍ່ດົນ ຜ່ານມາວ່າ:
ລາວ ຈັດຢູ່ໃນອັນດັບຄວາມສະດວກໃນການດຳເນີນທຸລະກິດ 154 ໃນຈຳນວນ 190 ປະ ເທດ ຈາກທີ່ເຄີຍຢູ່ໃນອັນດັບດີສຸດ 136 ໃນປີ 2016 ໃນນີ້ເຊິ່ງປະກອບດ້ວຍ 10 ຕົວຊີ້ວັດຢູ່ ໃນຫຼາຍກະຊວງທີ່ຈະຕ້ອງໄດ້ມີຄວາມພະຍາຍາມເຮັດໃຫ້ຕົວຊີ້ວັດຕ່າງໆທີ່ຍັງຂ້ອງຄາຫຼຸດຜ່ອນລົງ ການປັບປຸງລະບົບກົນໄກສົ່ງເສີມການລົງທຶນ ແລະ ສີ່ງອຳນວຍຄວາມສະດວກຕ່າງໆເປັນບັນຫາສຳຄັນທີ່ຈະຕ້ອງໄດ້ຮີບຮ້ອນໃນການຄົ້ນຄວ້າປະຕິບັດ ເພື່ອສົ່ງເສີມການລົງທຶນພາຍໃນໃຫ້ມີບັນຍາກາດຄືກຄື້ນເພາະຜ່ານມາຂອດຂັ້ນການແລ່ນເອກະສານຕ່າງຍັງມີຫຼາຍຂັ້ນຕອນເກີນໄປ.
ພາກລັດໄດ້ສ້າງລະບົບປະຕູດຽວໂດຍມີກະຊວງແຜນການ ແລະ ການລົງທຶນເປັນເຈົ້າການ ໂດຍໄດ້ໂຮມເອົາຫຼາຍກະຊວງທີ່ກ່ຽວຂ້ອງເຂົ້າມາເຮັດວຽກຮ່ວມກັນ ເພື່ອອຳນວຍຄວາມສະ ດວກດ້ານການລົງທຶນໃຫ້ມີຄວາມວ່ອງໄວ ພາຍຫຼັງການຈັດຕັ້ງມາໄດ້ໄລຍະໜຶ່ງແລ້ວເຫັນວ່າການດຳເນີນທຸລະກິດຢູ່ໃນທ່າກ້າວທີ່ດີ ແຕ່ກໍຍັງມີຫຼາຍຂອດຂັ້ນຢູ່ແຕ່ລະກະຊວງທີ່ຈະຕ້ອງໄດ້ສືບຕໍ່ແກ້ໄຂເພື່ອບໍ່ໃຫ້ນັກລົງທຶນ ໃຊ້ເວລາຍາວໃນການດຳເນີນເອກະສານຈາກກະ ຊວງນັ້ນໄປຫາກະຊວງນີ້ທີ່ເປັນການເສຍເວລາ ແລະ ເສຍຄ່າໂອກາດຂອງນັກລົງທຶນ, ທຸກກະຊວງຕ້ອງໄດ້ຮ່ວມກັນເອົາໃຈໃສ່ປະຕິບັດຢ່າງຈິງຈັງນັ້ນກໍ່ໝາຍເຖິງຕົວເລກການດຳ ເນີນທຸລະກິດໃຫ້ຫຼຸດລົງ, ການລົງທຶນພາຍໃນເພີ່ມຂຶ້ນໂດຍມັນຈະສົ່ງຜົນດີຕໍ່ລະບົບເສດຖະ ກິດມະຫາພາກຂອງ ສປປ ລາວ, ສ້າງວຽກເຮັດງານທຳໃຫ້ຫຼາຍຂຶ້ນຫັນເປັນອຸດສາຫະກຳທັນສະໄໝໃນອະນາຄົດ.
ປີ 2019 ສະພາແຫ່ງຊາດໄດ້ຮັບຮອງເອົາເສດຖະກິດແຫ່ງຊາດຈະຂະຫຍາຍຕົວໃນລະດັບ 6,7%, ແຂວງ 8 – 9% ສ່ວນນະຄອນຫຼວງວຽງຈັນຢູ່ໃນລະດັບ 9,5% ເປັນຕົວເລກທີ່ຂ້ອນຂ້າງສູງ ແລະ ທ້າທາຍພໍສົມຄວນຫາກທຽບກັບສະພາບເສດຖະກິດໂລກທີ່ຍັງເອົາແນ່ເອົານອນບໍ່ໄດ້ ແນວໃດກໍ່ຕາມນະໂຍບາຍການລົງທຶນເປັນກະແຈສຳຄັນທີ່ຈະຊ່ວຍເຮັດໃຫ້ການລົງທຶນທັງພາຍໃນ ແລະ ຕ່າງ ປະເທດເພີ່ມຂຶ້ນ.