ວັນທີ 21 ມີນາ 2019 ນີ້ ທີ່ກະຊວງສາທາລະນະສຸກ ໄດ້ມີກອງປະຊຸມຮ່ວມກັບສື່ມວນຊົນເພື່ອແນະນຳ ແລະ ເຜີຍແຜ່ຂໍ້ມູນຂ່າວສານກ່ຽວກັບພະຍາດໝາກແດງໃຫຍ່ ໂດຍເປັນປະທານຂອງທ່ານ ດຣ. ສີບຸນໂຮມ ອັກຄະວົງ ຮອງຫົວໜ້າກົມຄວບຄຸມພະຍາດຕິດຕໍ່, ທ່ານ ດຣ. ພອນປະເສີດອຸນາພົມຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ, ມີບັນດາພາກສ່ວນທີ່ກ່ຽວຂ້ອງ ແລະ ສື່ມວນຊົນຂະແໜງການອື່ນໆເຂົ້າຮ່ວມ.
ທ່ານ ດຣ.ສີບຸນໂຮມ ອັກຄະວົງ ກ່າວວ່າ: ໃນປະຈຸບັນພະຍາດໝາກແດງໄດ້ແພ່ລາມອອກໄປຫຼາຍໆທ້ອງຖິ່ນບໍ່ສະເພາະແຕ່ຢູ່ພາຍໃນນະຄອນຫຼວງວຽງຈັນ ແລະແຂວງຕ່າງໆໃນຂອບເຂດທົ່ວປະເທດກໍສາມາດເກີດພະຍາດດັ່ງກ່າວໄດ້ ໂດຍສະເພາະເດັກນ້ອຍທີ່ມີອາຍຸ 5 ປີລົງມາ, ໄດ້ກາຍເປັນສິ່ງທີ່ທ້າທາຍຕໍ່ສຸຂະພາບປະຊາຊົນ ແລະ ສ້າງຄວາມກັງວົນໃຫ້ແກ່ລັດຖະບານຂອງປະເທດຕ່າງໆໃນທົ່ວໂລກ, ສໍາລັບ ສປປ ລາວ ກໍເປັນໜຶ່ງໃນບັນດາປະເທດທີ່ປະເຊີນໜ້າກັບການເກີດພະຍາດດັ່ງກ່າວຊຶ່ງນັບແຕ່ວັນທີ 1 ມັງກອນເຖິງວັນທີ 19 ມີນາ 2019 ມີລາຍງານຜູ້ຕິດພະຍາດໝາກແດງທັງໝົດ 322 ກໍລະນີ ແລະ ເສຍຊີວິດ 1 ກໍລະນີ ໃນນັ້ນ ສະເພາະນະຄອນຫຼວງວຽງຈັນ ເກີດຢູ່ 6 ເມືອງ ມີທັງໝົດ 303 ກໍລະນີ ແລະເສຍຊີວິດ1 ກໍລະນີ, ແຂວງວຽງຈັນມີ 17 ກໍລະນີ ແລະ ແຂວງຄຳມ່ວນ 2 ກໍລະນີບໍ່ມີຜູ້ເສຍຊີວິດ.
ຕໍ່ກັບບັນຫາດັ່ງກ່າວ ກະຊວງສາທາລະນະສຸກ ໄດ້ສົມທົບກະຫຼາຍພາກສ່ວນທີ່ກ່ຽວຂ້ອງເພື່ອວາງມາດຕະການຕອບໂຕ້ຢ່າງວ່ອງໄວເປັນຕົ້ນເປີດກອງປະຊຸມ EOC ປະຈຳວັນ, ໄດ້ເຊື່ອມສານການເຝົ້າລະວັງພະຍາດໝາກແດງໃຫຍ່ເຂົ້າໃນລະບົບ DHIS2 ຢູ່ຂັ້ນນະຄອນຫຼວງ, ກຽມອົບຮົມໃຫ້ພະນັກງານກ່ຽວກັບວຽກງານ ແລະຄວບຄຸມພະຍາດໝາກແດງໃຫຍ່ຢູ່ແຂວງທີ່ໃກ້ຄຽງຄື້ ແຂວງບໍລິຄຳໄຊ, ໄຊສົມບູນ, ວຽງຈັນ ແລະ ນະຄອນຫຼວງວຽງຈັນ, ແບ່ງທິມງານປະຈຳພາກສະໜາມຜູ້ 3 ຈຸດຄືຈຸດຫ້ວຍຈຽມ, ສຸກສາລາ ແລະ ເມືອງທຸລະຄົມເພື່ອຄົ້ນຫາກໍລະນີໃໝ່ ແລະ ໃຫ້ບໍລິການປິ່ນປົວ.