ໃນ 2 ປີຜ່ານມາ, ກົມນະໂຍບາຍເງິນຕາ ທະນາຄານ ແຫ່ງ ສປປ ລາວ(ທຫລ) ໄດ້ອອກແຈ້ງການສະບັບເລກທີ 804/ກນງ ລົງວັນ ທີ 22 ສິງຫາ 2017 ກ່ຽວກັບການໂຈະຊົ່ວຄາວການຮັບເອກະສານຄຳຮ້ອງ ແລະ ການອອກໃບອະນຸຍາດດຳເນີນທຸລະກິດແລກປ່ຽນ ເງິນຕາໃນທົ່ວປະເທດ.
ທັງນີ້ກໍເພື່ອທົບທວນ ແລະ ປະເມີນຜົນການຈັດຕັ້ງປະຕິບັດກົດໝາຍ ວ່າດ້ວຍການຄຸ້ມຄອງເງິນຕາຕ່າງປະເທດ ແລະ ຂໍ້ຕົກລົງ ວ່າດ້ວຍການດຳເນີນທຸລະກິດແລກປ່ຽນເງິນຕາໃຫ້ສອດຄ່ອງ ແລະ ຖືກຕ້ອງຕາມລະບຽບການກຳນົດ; ຜ່ານການຈັດຕັ້ງປະຕິບັດ ແຈ້ງການສະບັບດັ່ງກ່າວເຫັນວ່າ:
ໄດ້ຮັບຜົນດີສົມຄວນ ແຕ່ໃນຂະນະດຽວກັນ ກໍຍັງມີນັກທຸລະກິດ ແລະ ຜູ້ສົນໃຈປະສົງດຳເນີນທຸລະກິດແລກປ່ຽນເງິນຕາຈຳນວນໜຶ່ງຍັງບໍ່ທັນຮັບຊາບ ແລະ ເຂົ້າໃຈແຈ້ງຕໍ່ແຈ້ງການສະບັບດັ່ງກ່າວ.
ສະນັ້ນ, ເພື່ອເຮັດໃຫ້ບຸກຄົນ ແລະ ນິຕິບຸກຄົນທີ່ມີຈຸດປະສົງຕ້ອງການດຳເນີນທຸລະກິດແລກປ່ຽນເງິນຕາ ໄດ້ຮັບຊາບຢ່າງທົ່ວເຖິງ ກັນຕື່ມອີກ.
ກົມນະໂຍບາຍເງິນຕາ ທະນາຄານ ແຫ່ງ ສປປ ລາວ ໄດ້ສືບຕໍ່ແຈ້ງໂຈະການອອກໃບອະນຸຍາດດຳເນີນທຸລະກິດແລກ ປ່ຽນເງິນຕາໃນທົ່ວປະເທດຕື່ມອີກ ສະບັບເລກທີ 571/ກນງ; ລົງວັນທີ 10 ພຶດສະພາ 2019 ໄດ້ລະບຸວ່າ:
ທະນາຄານ ແຫ່ງ ສປປ ລາວ ຈະສືບຕໍ່ໂຈະການຮັບເອກະສານຄຳຮ້ອງ ແລະ ການອອກໃບອະນຸຍາດດຳເນີນທຸລະກິດແລກປ່ຽນເງິນຕາໃນຂອບເຂດທົ່ວປະ ເທດຈົນກວ່າຈະມີແຈ້ງການສະບັບໃໝ່ປ່ຽນແທນເພື່ອທົບທວນການຈັດຕັ້ງປະຕິບັດລະບຽບຂອງບັນດາຮ້ານແລກປ່ຽນເງິນຕາທີ່ ໄດ້ຮັບອະນຸຍາດ ແລະ ຕິດຕາມການແລກ ປ່ຽນເງິນຕາ ທີ່ບໍ່ໄດ້ຮັບການອະນຸຍາດຈາກທະນາຄານ ແຫ່ງ ສປປ ລາວ, ພ້ອມທັງປັບ ປຸງນິຕິກຳທີ່ກ່ຽວຂ້ອງເພື່ອເຮັດໃຫ້ການຈັດຕັ້ງປະຕິບັດການຄຸ້ມຄອງຮ້ານແລກປ່ຽນເງິນຕາ ມີປະສິດທິຜົນ ແລະ ສອດຄ່ອງຕາມກົດ ໝາຍ ແລະ ລະບຽບການທີ່ກ່ຽວຂ້ອງ.
ດັ່ງນັ້ນ, ຈຶ່ງຮຽກຮ້ອງມາຍັງບັນດາຜູ້ປະກອບການດຳເນີນທຸລະກິດແລກປ່ຽນເງິນຕາໃນທົ່ວປະເທດ ຈົ່ງພ້ອມ ກັນປະຕິບັດກົດໝາຍ ວ່າດ້ວຍການຄຸ້ມຄອງເງິນຕາຕ່າງປະເທດ ແລະ ຂໍ້ຕົກລົງ ວ່າດ້ວຍການດຳເນີນທຸລະກິດແລກປ່ຽນເງິນຕາ ແລະ ນິຕິກຳ ລຸ່ມກົດໝາຍທີ່ຕິດພັນກັບທຸລະກິດແລກປ່ຽນເງິນຕາຢ່າງເຂັ້ມງວດ.
(ແຫຼ່ງຂໍ້ມູນຈາກ: ໜັງສືພິມ ລາວພັດທະນາ)