ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕົກລົງອະນຸມັດການຍ້ອງຍໍ ທີມແຂ່ງຂັນ ASEAN Quiz ຂອງ ສປປ ລາວ ມີ ນາງ ທິບເກສອນ ເຂັມທອງ ມາຈາກໂຮງຮຽນ ມັດທະຍົມສົມບູນປາກເຊ ແຂວງຈຳປາສັກ; ນາງ ສຸນິຕາ ສຸກສຳລານ ໂຮງຮຽນມັດທະ ຍົມສົມບູນແສງດາລາ ນະຄອນຫລວງວຽງຈັນ ແລະ ທ້າວ ສົມໃຈ ຈວງໃບ ໂຮງຮຽນມັດ ທະຍົມສົມ ບູນສະຫວັນນະເຂດ, ແຂວງສະຫວັນນະເຂດ ທີ່ເປັນຕົວແທນນັກຮຽນເກັ່ງ ລະດັບມັດທະຍົມຕອນປາຍ ສາມາດຍາດໄດ້ ຕຳແໜ່ງຮອງຊະນະເລີດ ໃນການແຂ່ງຂັນ ຖາມ-ຕອບ ຄວາມຮູ້ກ່ຽວກັບ ອາຊຽນລະດັບພາກພື້ນ ຄັ້ງທີ 8, ທີ່ເມືອງບາຫລີ, ປະເທດອິນໂດເນເຊຍ, ເຊິ່ງຈັດຂຶ້ນໃນລະຫວ່າງວັນທີ 3-7 ທັນ ວາ 2018.
ການມອບໃບຍ້ອງຍໍຄັ້ງນີ້, ໂດຍທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃນວັນທີ 31 ທັນວາ 2018 ທີ່ໂທລະພາບແຫ່ງຊາດລາວ ໃນພິທີມອບລາງວັນຜະລິດຕະພັນສື່ ແລະ ພິມຈຳໜ່າຍດີເດັ່ນ.
ໃນໂອກາດດັ່ງກ່າວ, ທ່ານ ວໍລະສັກ ປຣະວົງວຽງຄໍາ ຮອງຜູ້ອໍານວຍການໃຫຍ່ວິທະຍຸກະຈາຍ ສຽງແຫ່ງຊາດລາວ, ປະທານຄະນະ ອະນຸກຳມະການຖະແຫລງຂ່າວ ອາຊຽນແຫ່ງ ສປປ ລາວ ທັງເປັນຫົວໜ້າໂຄງການ ASEAN QUIZ ແຫ່ງ ສປປ ລາວ ກ່າວວ່າ: ຜ່ານການແຂ່ງຂັນ ທີ່ໄດ້ແບ່ງອອກເປັນ 2 ຮອບ, ແຕ່ລະຮອບປະກອບດ້ວຍ 4 ໝວດຄໍາຖາມ; ຊຶ່ງດຳເນີນໄປເປັນເວລາ 2 ຊົ່ວ ໂມງ, ຜົນສະຫລຸບຂອງການ ແຂ່ງຂັນປະກົດວ່າ: ຊະນະເລີດໄດ້ແກ່ ປະເທດອິນໂດເນເຊຍ (ເຈົ້າ ພາບ), ຮອງຊະນະເລີດ ໄດ້ແກ່ ສປປ ລາວ, ອັນດັບ 3 ປະເທດຟີລິບປິນ, ອັນດັບ 4 ໄດ້ຮ່ວມກັນ 2 ປະເທດ ຄື ສິງກະໂປ ແລະ ຫວຽດນາມ, ອັນດັບ 6 ໄດ້ແກ່ ປະເທດໄທ, ອັນດັບ 7 ປະເທດມຽນມາ, ອັນດັບ 8 ປະເທດບຣູໄນ ດາຣຸດຊາລຳ ແລະ ອັນດັບ 9 ປະເທດກຳປູເຈຍ.
ສຳລັບທີມຂອງປະເທດ ທີ່ສາມາດຍາດໄດ້ຕຳແໜ່ງ ແຕ່ອັນດັບທີໜຶ່ງຫາອັນດັບທີສາມ ແມ່ນໄດ້ຮັບຖ້ວຍລາງວັນ ພ້ອມເງິນສົດ: ລາງວັນທີໜຶ່ງ1.500 ໂດລາສະຫະລັດ; ລາງວັນທີສອງ 1.200 ໂດລາສະຫະລັດ ແລະ ລາງວັນທີສາມ 900 ໂດລາສະຫະລັດ. ພ້ອມກັນນີ້, ທີມນັກຮຽນຈາກ ສປປ ລາວ ຍັງສາມາດຍາດໄດ້ຕຳແໜ່ງ ຮອງຊະນະເລີດ ໃນການແຂ່ງຂັນມິດຕະພາບ (Friendship Competition) ໃນຮູບແບບຫລິ້ນເກມ Inter-active games ເປັນເກມທົດສອບໄຫວພິບ ປະຕິພານ ແລະ ຄວາມວ່ອງໄວຄ່ອງແຄ້ວ, ແຂ່ງຂັນແບບມິດຕະພາບ ດ້ວຍຄວາມເບີກບານມ່ວນຊື່ນ, ເຊິ່ງລາງວັນເປັນເງິນສົດຈຳນວນ 900 ໂດລາສະຫະລັດ.
ໂຄງການ ASEAN Quiz ມີຈຸດປະສົງ ເພື່ອແນ່ໃສ່ໂຄສະນາເຜີຍແຜ່ ແລະ ສົ່ງເສີມນ້ຳໃຈອັນດີງາມ ຂອງການແຂ່ງຂັນເພື່ອມິດຕະພາບແລະ ຄວາມສາມັກຄີລະຫວ່າງ ບັນດາຊາວໜຸ່ມອາຊຽນ ໂດຍຜ່ານເກມການ ແຂ່ງຂັນຖາມ-ຕອບ ຊຶ່ງເປັນການນຳສະເໜີ ແລະ ສ່ອງແສງໃຫ້ເຫັນແລະ ຮັບຮູ້ກ່ຽວກັບຄວາມເປັນມາ ແລະ ວິວັດທະນາການທາງ ດ້ານປະຫວັດສາດ, ສັງຄົມ, ວັດທະນະທຳ, ການເມືອງ ແລະ ເສດຖະກິດ ພາຍໃນພາກພື້ນອາຊີຕະເວັນອອກສ່ຽງໃຕ້. ນອກຈາກນີ້, ກໍ່ເພື່ອສົ່ງເສີມຄວາມຮັບຮູ້ ແລະ ຄວາມເຂົ້າໃຈ ແລະ ທັງເສີມສ້າງທັດສະນະມູມມອງທີ່ດີ ແລະຖືກຕ້ອງກ່ຽວກັບອາຊຽນຂຶ້ນຕື່ມ ລວມທັງເພື່ອເສີມຂະຫຍາຍ ຄວາມເຂົ້າອົກເຂົ້າໃຈຊຶ່ງກັນ ແລະ ກັນ ແລະ ຄວາມສາ ມັກຄີ ລະຫວ່າງບັນດາປະຊາຊາດອາຊຽນ ກໍ່ຄື ໃນແວດວົງນັກຮຽນ ນັກສຶກສາອາຊຽນ ໃນຂະບວນວິ ວັດແຫ່ງການເຊື່ອມໂຍງ ແລະ ການເຊື່ອມຈອດອາຊຽນ ແລະ ການສ້າງປະຊາຄົມອາຊຽນໃຫ້ນັບມື້ນັບເຂັ້ມແຂງ.
ທ່ານ ວໍລະສັກ ປຣະວົງວຽງຄໍາ ກ່າວຕື່ມວ່າ: ຈາກຜົນງານອັນຍິ່ງໃຫຍ່ ເປັນປະຫວັດສາດທີ່ສາມາດສ້າງໄດ້ໃນຄັ້ງນີ້, ຄະນະຮັບຜິດຊອບໂຄງການ ASEAN Quiz ແຫ່ງ ສປປ ລາວ ກໍ່ຄື ນ້ອງໆນັກຮຽນເກັ່ງ ຂອງພວກເຮົາທັງສາມ ຈຶ່ງຮູ້ສຶກເປັນກຽດຢ່າງສູງ ແລະ ພາກພູມໃຈຢ່າງຍິ່ງ ແລະ ສະແດງໃຫ້ເຫັນເຖິງ ນັກຮຽນລາວຂອງພວກເຮົາ ກໍຄື ສາມນ້ອງເປັນຄົນທີ່ຮຽນດີຮຽນເກັ່ງ, ມີຄວາມຮູ້ຄວາມສາມາດສູງ ແລະ ຄຸນນະພາບການສຶກສາຂອງບ້ານເຮົາ ກໍນັບມື້ນັບມີຄຸນນະພາບສູງ. ການແຂ່ງຂັນ ASEAN QUIZ ໃນ 7 ຄັ້ງຜ່ານມາ ແມ່ນໄດ້ຈັດຂຶ້ນທີ່ປະເທດໄທ (ປີ 2002), ປະເທດ Brunei Darrussalam (ປີ 2004), ປະເທດມາເລເຊຍ (ປີ 2006), ປະເທດຟີລິບປີນ (ປີ 2009) ແລະ ຣາຊະອານາຈັກ ກຳປູເຈຍ (ປີ2011, ປະເທດຫວຽດນາມ (2014), ແລະ ປະເທດ ສປປ ລາວ (2016) ຕາມລຳດັບ. ໃນການແຂ່ງຂັນຄັ້ງທີ 7 ຜ່ານມາ ທີ່ ສປປ ລາວເຮົາເປັນເຈົ້າພາບ ດ້ວຍຕຳແໜ່ງຊະນະເລີດ.
ທີ່ມາ: ຂປລ
Hits: 7
