ຮ້ານ ລ້ານປັ່ນ ເປັນຮ້ານຂາຍນ້ຳປັ່ນທຸກປະເພດ ທີ່ເລືອກນຳໃຊ້ການຂາຍຜ່ານລະບົບອອນລາຍເປັນຕົວຂະຫຍາຍຖານລູກຄ້າໃຫ້ຫຼາຍຂຶ້ນ ຈົນເຮັດໃຫ້ທຸລະກິດມີຄວາມໝັ້ນຄົງ ແລະ ມີລູກຄ້າມາໃຊ້ບໍລິການເປັນປະຈຳ.
ນາງ ນິດຖະພອນ ແຕມວົງສາ, ເຈົ້າຂອງ ຮ້ານລ້ານປັ່ນ ກ່າວວ່າ ຮ້ານຂອງເພິ່ນເປີດມາໄດ້ 5 ປີແລ້ວ ສາເຫດທີ່ຕັ້ງຊື່ຮ້ານຮ້ານປັ່ນ ກໍເພື່ອຢາກໃຫ້ໄດ້ປັ່ນມື້ລະລ້ານຈອກ ແລະ ອີກຢ່າງກໍເປັນເພາະເຈົ້າຂອງຮ້ານຫົວລ້ານນຳ ອິອິອິ!!!.
ແຕ່ສຳລັບອອນລາຍ ແມ່ນເລີ່ມເຮັດມາໃນຊ່ວງປີ 2019 ໂດຍການສ້າງເພຈ ທີ່ເປັນຂອງຮ້ານເອງ ແລະ ກໍໂພສລົງເຟສບຸກສ່ວນຕົວນຳ ເພື່ອໃຫ້ລູກຄ້າໄດ້ຮູ້ຈັກຫຼາຍຂຶ້ນ ອີກທັງເປັນຊ່ອງທາງໜຶ່ງໃນການຂາຍນຳ.
ການຂາຍອອນລາຍ ເມື່ອທຽບກັບ ຂາຍໜ້າຮ້ານ ຂ້ອນຂ້າງຈະແຕກຕ່າງກັນ ຖ້າຂາຍສະເພາະແຕ່ໜ້າຮ້ານກໍຈະເຮັດໃຫ້ມີແຕ່ລູກຄ້າເກົ່າທີ່ເຄີຍມາຊື້, ສ່ວນການຂາຍອອນລາຍ ເຮັດໃຫ້ເປີດກວ້າງຮ້ານເຮົາ ໃຫ້ເປັນທີ່ຮູ້ຈັກກັນຫຼາຍຂຶ້ນ ບໍ່ສະເພາະແຕ່ນ້ອງນັກຮຽນທີ່ເປັນລູກຄ້າປະຈຳ ແຕ່ຍັງເປັນທີ່ຮູ້ຈັກຂອງພະນັກງານຢູ່ບໍລິສັດຕ່າງໆນຳອີກ.
ການຂາຍອອນລາຍກໍມີທັງຂໍ້ສະດວກ ແລະ ຂໍ້ຫຍຸ້ງຍາກ ສຳລັບຮ້ານລ້ານປັ່ນແລ້ວ ຂໍ້ຫຍຸ້ງຍາກກໍຈະເປັນຊ່ວງຂາຍອອນລາຍໃໝ່ໆ ທີ່ເຮົາຍັງໄດ້ເລາະສົ່ງລູກຄ້າດ້ວຍຕົນເອງຢູ່, ແຕ່ພໍຂາຍໄປດົນລູກຄ້າເລີ່ມຫຼາຍ ເລີ່ມມີຄົນຮູ້ຈັກຮ້ານເຮົາ ແລະ ສັ່ງຫຼາຍຂຶ້ນເຮົາກໍໄດ້ໃຫ້ ໄຣເດີ ໄປສົ່ງແທນ.
ສ່ວນຂໍ້ສະດວກ ຂອງການຂາຍອອນລາຍ ກໍຄືການທີ່ເຮົາບໍ່ຈຳເປັນຕ້ອງລົງໄປໂຄສະນາ ຫາລູກຄ້າດ້ວຍຕົນເອງ ພຽງແຕ່ເຮົາໂຄສະນາສິນຄ້າທີ່ຮ້ານເຮົາຂາຍ ຜ່ານທາງອອນລາຍ ກໍສາມາດເຮັດໃຫ້ໄດ້ລູກຄ້າໃໝ່ຮູ້ຈັກໄດ້ ແລະ ຂໍສະດວກອີກອັນໜຶ່ງ ຂອງການຂາຍອອນລາຍ ກໍເພື່ອຄວາມສະດວກຂອງລູກຄ້າ ທີ່ຢາກກິນນ້ຳປັ່ນຮ້ານເຮົາໂດຍການສັ່ງຜ່ານເພຈຂອງຮ້ານໄດ້ເລີຍ ຈະມີບໍລິການຈັດສົ່ງໃຫ້ລູກຄ້າເຖິງທີ່.
ຜົນດີຂອງການຂາຍອອນລາຍ ເຮັດໃຫ້ຖານລູກຄ້າໝັ້ນຄົງ, ຄົນຮູ້ຈັກຫຼາຍຂຶ້ນ, ມີກຸ່ມເປົ້າໝາຍຫຼາຍຂຶ້ນ ບໍ່ແມ່ນສະເພາະແຕ່ລູກຄ້າເກົ່າ ແຕ່ເຮົາໄດ້ຮັບລູກຄ້າໃໝ່ເຂົ້າມາທຸກມື້.