ສຳນັກຂ່າວສານປະເທດລາວ ໄດ້ໃຫ້ຮູ້ວ່າ: ງານບຸນແຫ່ທຸງປະຈຈຳຊາດ ບັນດາປະເທດໃນໂລກ ຄັ້ງທີ 17 ປະຈຳປີ 2022 ທີ່ ເມືອງລີຢົງ, ປະເທດຝຮັ່ງ ເຊິ່ງຈັດຂຶ້ນເພື່ອເປັນການສົ່ງເສີມສະແດງວັດທະນະທຳ ແລະ ຮີດຄອງປະເພນີ ຂອງແຕ່ລະປະເທດທີ່ເຂົ້າຮ່ວມ ເຊິ່ງ ສປປ ລາວ ກໍເປັນໜຶ່ງໃນນັ້ນ.
ໂດຍງານໃນປີນີ້ ລວມມີ 29 ປະເທດເຂົ້າຮ່ວມຄື: ເບຣຊີນ, ອາມາຊອນ, ກຸຍບາ, ເວເນຊູເອລາ, ໂບລີເວຍ, ເປລູ, ເມັກຊີກໂກ, ກົວເດີລຸກ, ໂປລີເນເນຊີ, ມາລີ, ມາດາກັດກາ, ຝຮັ່ງ, ອູແກຣນ, ສາທາລະນະລັດເບລາລຸດ, ຣູມານີ, ໂມນດາວີ, ບຸນກາລີ, ໂປໂລຍ, ຊີລີ, ຍີ່ປຸ່ນ, ຟີລີບປີນ, ອິນໂດເນເຊຍ, ຫວຽດນາມ, ກຳປູເຈ້ຍ, ລາວ, ໄທ, ອີນເດຍ ແລະ ຈີນ.
ປະເທດລາວເຮົາ ໄດ້ສະແດງໃຫ້ນາໆຊາດໄດ້ເຫັນເຖິງ ວັດທະນະທຳສະເພາະຂອງລາວ ເຊັ່ນ: ຜູ້ຊາຍໃສ່ເສື້ອໄໝ, ຜູ້ຍິງໃສ່ສິ້ນໄໝ, ການເກົ້າຜົມບ່ຽງແພ ແລະ ຂັບລຳຮ້ອງເພງລາວ ພ້ອມກັບການຟ້ອນລຳວົງ.
ສຳລັບປີນີ້ ຜູ້ທີ່ເປັັນຕົວແທນປະເທດລາວເຮົາ ໃນຂະບວນແຫ່ທຸງຊາດຂອງປະເທດລາວນຳໂດຍ ທ່ານ ໂອສະກະ ລາດຊະພົນ, ທີ່ປືກສາທູດແຫ່ງ ສປປ ລາວ ປະຈຳປະເທດຝຮັ່ງ, ທ່ານ ຈູມຄຳ ຫລວງວັນ, ກຳມະການສູນກາງ ແນວລາວສ້າງຊາດທີ່ປະເທດຝຮັ່ງ ແລະ ປະທານຄົນລາວທີ່ປະເທດຝຮັ່ງ, ພ້ອມດ້ວຍຄົນລາວທີ່ອາໃສຢູ່ປະເທດຝຮັ່ງເປັນຈຳນວນຫຼາຍ.
ທີ່ມາ: ປະຊາຊົນ