ການລັກຊັບພົນລະເມືອງໃນນະຄອນຫຼວງວຽງຈັນ (ນວ) ຍັງເປັນບັນຫາທີ່ພົ້ນເດັ່ນ ແລະ ເກີດຂຶ້ນໃນແຕ່ລະວັນຈໍານວນຫຼາຍຄັ້ງ ເປັນຕົ້ນແມ່ນບັນຫາການລັກລົດຈັກ ເຊິ່ງກຸ່ມຄົນບໍ່ດີດັ່ງກ່າວໄດ້ກໍ່ເຫດເຄື່ອນໄຫວກະທໍາຜິດແບບຕ່ອງໂສ້ ແລະ ເປັນກຸ່ມແກ້ງ.
ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ຫົວໜ້າຫ້ອງຕໍາຫຼວດ ໄດ້ໃຫ້ຮູ້ວ່າ ປັດຈຸບັນ ສະພາບປະກົດການຫຍໍ້ທໍ້ທີ່ເກີດຂື້ນຢູ່ນະຄອນຫຼວງວຽງຈັນ ຍັງເປັນບັນຫາທີ່ພົ້ນເດັ່ນ ໂດຍສະເພາະ ການປຸ້ນຊັບ-ຊີງຊັບ, ງັດແງະ-ລັກຊັບ ພົ້ນເດັ່ນແມ່ນການລັກລົດຈັກເກີດຂຶ້ນເປັນລາຍວັນ ເຫັນວ່າມີລັກສະນະເພີ່ມຂຶ້ນ ຫຼື ຫຼຸດລົງໃນບາງຄັ້ງຄາວ ຍ້ອນກຸ່ມຄົນບໍ່ດີຈຳນວນໜຶ່ງຍັງສືບຕໍ່ເຄື່ອນໄຫວສ້າງຄວາມບໍ່ສະຫງົບ.
ໃນນີ້້, ບາງກຸ່ມຍັງໄດ້ນໍາໃຊ້ພາຫານະເຄື່ອງມືອຸປະກອນ-ອາວຸດປະເພດລົດຈັກບໍ່ຕິດປ້າຍທະບຽນ ຫຼືປ້າຍປອມຂີ່ຊ້ອນກັນ ແລ້ວຊອກຫາເຍື່ອເມື່ອພວກເຂົາມີໂອກາດ, ຊ່ອງຫວ່າງກໍ່ລົງມືກໍ່ເຫດປຸ້ນຊັບ-ຊີງຊັບຂອງບຸກຄົນ ນັບທັງຄົນລາວ ຫຼື ຄົນຕ່າງປະເທດ ແລະ ຈຳນວນໜຶ່ງກໍນຳໃຊ້ເຄື່ອງມືອຸປະກອນເຂົ້າງັດເເງະລັກຊັບຕາມບໍລິສັດ, ສໍານັກງານອົງການ ແລະ ເຮືອນປະຊາຊົນ ເມື່ອສຳເລັດແລ້ວກໍເອົາໂຕຫຼົບໜີໄປລີ້ຊ່ອນຢູ່ຕ່າງເມືອງ, ຕ່າງແຂວງເພື່ອຫຼີກລ້ຽງການຈັບກຸມຂອງເຈົ້າໜ້າທີ່.
ຍ້ອນແນວນັ້ນ, ປກສ ນະຄອນຫຼວງວຽງຈັນ ໄດ້ສຸມໃສ່ແກ້ໄຂຕາມຄຳສັ່ງວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂສະພາບປະກົດການຫຍໍ້ທໍ້ໃນສັງຄົມ ໂດຍສົມທົບກັບກອງບັນຊາການ ປກສ 9 ເມືອງ ໂດຍອອກເຄື່ອນໄຫວກວດກາລາດຕາເວນຕາມຈຸດຫຼໍ່ແຫຼມ ແລະ ເສັ້ນທາງສ່ຽງ.
ຂໍ້ມູນຈາກ: ຄວາມສະຫງົບ Lao Security News