Thursday, July 18, 2024
Lenovo

7 ຂໍ້ຄວນປະຕິບັດສໍາລັບສາວໆທີ່ຕ້ອງຮັບມືກັບລົມໜາວ

ທ້າຍປີທີ່ເຂົ້າມາພ້ອມກັບລົມໜາວ ເມື່ອເປັນແບບນີ້ ເຮົາກໍຄວນກຽມຮັບມືກັບລະດູໜາວໃຫ້ພ້ອມ ເພື່ອໃຫ້ຮ່າງກາຍສາມາດຕໍ່ສູ້ກັບລົມໜາວ  ແລະ ມີສຸຂະພາບແຂງແຮງ ຫ່າງໄກຈາກໂຣກໄພໄຂ້ເຈັບ ດັ່ງນັ້ນມື້ນີ້ເຮົາໄດ້ນຳ 7 ຂໍ້ປະຕິບັດດີໆ ທີ່ສາວໆຄວນເຮັດໃນລະດູໜາວມາຝາກກັນ.

  1. ອອກກຳລັງກາຍຢ່າງສະໝ່ຳສະເໝີ

ຈະໜາວປານໃດກໍຕ້ອງກຽມຮ່າງກາຍໃຫ້ແຂງແຮງໄວ້ກ່ອນ ພຽງແຕ່ແລ່ນອອກກຳລັງກາຍຕອນເຊົ້າເພື່ອໃຫ້ຮ່າງກາຍຜ່ອນຄາຍ ກໍຈະເຮັດໃຫ້ສົດຊື່ນໄດ້ ເພາະອາກາດຈະໜາວພຽງໃດ ການອອກກຳລັງກາຍຈະຊ່ວຍໃຫ້ຮ່າງກາຍອົບອຸ່ນໄດ້ສະເໝີ ແລະ ສຸຂະພາບກໍຈະແຂງແຮງ ຫ່າງໄກຈາກໂຣກໄພໄຂ້ເຈັບ ທີ່ມາພ້ອມກັບອາກາດໜາວ.

2. ຕີນມືຕ້ອງອຸ່ນ

ເຖິງວ່າຮ່າງກາຍຈະແຂງແຮງພຽງໃດ ກໍຕ້ອງເຮັດໃຫ້ຮ່າງກາຍອົບອຸ່ນໄວ້ກ່ອນ, ນອກຈາກເສື້ອກັນໜາວ ແລະ ໂສ້ງຂາຍາວແລ້ວ ສິ່ງສຳຄັນຢ່າລືມໃສ່ຖົງມື, ຖົງຕີນ ເພື່ອໃຫ້ຄວາມອົບອຸ່ນນຳ ເພາະເນື່ອງຈາກມື ແລະ ຕີນນັ້ນເປັນແຫ່ງລວມເສັ້ນປະສາດ ຫາກປ່ອຍໃຫ້ເຢັນຈົນແຂງ ກໍອາດຈະເຮັດໃຫ້ເປັນຫວັດໄດ້ງ່າຍໆ.

3. ກິນອາຫານທີ່ມີປະໂຫຍດຕໍ່ຮ່າງກາຍ

ເມື່ອເຂົ້າລະດູໜາວ ຄົນສ່ວນໃຫຍ່ມັກຈະເປັນໄຂ້ຫວັດ ດັ່ງນັ້ນຄວນປ້ອງກັນຕົນເອງໄວ້ກ່ອນ ໂດຍການເລືອກກິນອາຫານທີ່ມີປະໂຫຍດຕໍ່ຮ່າງກາຍ ເພາະນີ້ເປັນຕົວຊ່ວຍສຳຄັນ ໃນການເພີ່ມພູມຕ້ານທານ ໃຫ້ກັບຮ່າງກາຍໄດ້ຢ່າງດີເລີຍ ໂດຍການກິນອາຫານໃຫ້ຄົບ 5 ໝູ່ເຊັ່ນ: ຜັກ, ໝາກໄມ້ ແລະ ເນັ້ນອາຫານທີ່ມີທາດເຫຼັກ ຢ່າງຊິ້ນສັດ, ຖົ່ວ, ເຕົ້າຫູ້ ແລະ ໄຂ່ ເຊິ່ງທາດເຫຼັກຈະຊ່ວຍປ້ອງກັນໄຂ້ຫວັດ ແລະ ເພີ່ມພູມຕ້ານທານໃຫ້ກັບຮ່າງກາຍໄດ້ເປັນຢ່າງດີ.

4. ກິນວິຕາມິນ

ສຳລັບໃຜທີ່ມີຮ່າງກາຍອ່ອນແອຢູ່ແລ້ວ ຫາກພົບກັບອາກາດໜາວແຮງ ກໍຈະເຮັດໃຫ້ອາການຮ້າຍແຮງລົງກວ່າເກົ່າ ດັ່ງນັ້ນຄວນຈະປ້ອງກັນເອົາໄວ້ກ່ອນ ໂດຍການກິນອາຫານທີ່ມີປະໂຫຍດ ຄວບຄູ່ໄປກັບວິຕາມິນ ເພື່ອເພີ່ມພູມຄຸ້ມກັນ ໃຫ້ກັບຮ່າງກາຍເຊັ່ນ: ວິຕາມິນເອ, ວິຕາມິນອີ, ວິຕາມິນຊີ ເຊິ່ງວິຕາມິນເຫຼົ່ານີ້ຈຳເປັນຫຼາຍ ທີ່ຈະຊ່ວຍໃຫ້ຫ່າງໄກຈາກໄຂ້ຫວັດໄດ້.

5. ບໍ່ຄວນອາບນ້ຳອຸ່ນເກີນໄປ

ໃນຍາມໜາວບໍ່ຄວນອາບນ້ຳອຸ່ນເກີນໄປ ແລະ ດົນເກີນໄປ ໂດຍສະເພາະການລ້າງໜ້າ ເພາະນ້ຳອຸ່ນຈະເຮັດໃຫ້ຄວາມຊຸ່ມຊື່ນຂອງຜີວຫາຍໄປ ນອກຈາກນັ້ນຄວນຫຼີກລ້ຽງຜະລິດຕະພັນ ທີ່ມີຟອງຫຼາຍ ເພາະຈະດຶງຄວາມຊຸ່ມຊື່ນໄປຈາກຜີວ ແລະ ບໍ່ຄວນຂັດຜີວແຮງ ເພາະຈະເຮັດໃຫ້ຜີວລອກຫຼາຍຂຶ້ນ, ນອກຈາກນີ້ ກໍບໍ່ຈຳເປັນຕ້ອງສະຜົມຕະຫຼອດ ເພາະອາດຈະເຫັນໃຫ້ໜັງຫົວແຫ້ງເກີນໄປ.

6. ບຳລຸງຜີວໃຫ້ຊຸ່ມຊື່ນຢູ່ສະເໝີ

ຊ່ວງລະດູໜາວແບບນີ້ ຈຳເປັນຫຼາຍທີ່ຈະຕ້ອງທາໂລຊັ້ນບຳລຸງຜີວ ຫຼັງອາບນ້ຳຂະນະທີ່ຜີວຍັງຊຸ່ມຢູ່ ຈະຊ່ວຍປ້ອງກັນຜີວແຫ້ງ, ແຕກ ແລະ ລອກ ໃນລະດູໜາວໄດ້ເປັນຢ່າງດີ ທີ່ສຳຄັນການທາຄຣີມ ບໍ່ແມ່ນທາສະເພາະສ່ວນໃດສ່ວນໜຶ່ງເທົ່ານັ້ນ ແຕ່ຄວນທາໃຫ້ທົ່ວຮ່າງກາຍ, ນອກຈາກນີ້ຢ່າລືມເພີ່ມຄວາມຊຸ່ມຊື່ນ ໃຫ້ກັບປາກຂອງເຮົານຳ ໂດຍການເອົາລີບສະຕີກ ຕິດຕົວໄວ້ຕະຫຼອດເວລາ ຈະຊ່ວຍໃຫ້ປາກຊຸ່ມຊື່ນຕະຫຼອດໝົດມື້ໄດ້ແນ່ນອນ.

7. ດື່ມເຄື່ອງດື່ມທີ່ໃຫ້ຄວາມອົບອຸ່ນແກ່ຮ່າງກາຍ

ອາກາດໜາວໆແບບນີ້ ກ່ອນນອນຄວນດື່ມນົມອຸ່ນ ຫຼື ນ້ຳອຸ່ນ ຈັກຈອກ 1 ຫາ 2 ຈອກ ຈະຊ່ວຍໃຫ້ຮ່າງກາຍອົບອຸ່ນຂຶ້ນໄດ້ ແລະ ນອກຈາກຮ່າງກາຍຈະອົບອຸ່ນແລ້ວ ຍັງຊ່ວຍບຳລຸງໃຫ້ຮ່າງກາຍເຂັ້ມແຂງຂຶ້ນໄດ້ອີກດ້ວຍ.

ແລະນີ້ຄື 7 ຂໍ້ຄວນປະຕິບັດງ່າຍໆ ທີ່ບໍ່ຄວນລະເລີຍໃນລະດູໜາວນີ້ ເມື່ອຮູ້ກັນແລ້ວ ຢ່າລືມນຳໄປປະຕິບັດກັນນຳເດີ ຈະໄດ້ມີສຸຂະພາບດີກັນທົ່ວໜ້າ ແລະ ປອດໄພຈາກໄຂ້ຫວັດຕະຫຼອດລະດູໜາວນີ້.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຈົບມໍປາຍ ຈະຮຽນຕໍ່ສາຍໃດດີ?

ເມື່ອກ່ອນ ການສຶກສາຖືໄດ້ວ່າມີບັນຍາກາດຄຶກຄື້ນ ແລະ ເປັນຂະບວນການ ຫຼາຍຄົນແຂ່ງກັນຮຽນ ແຂ່ງກັນເສັງເພື່ອຈະໄດ້ເຂົ້າຮຽນສາຍທີ່ຕົນເອງມັກ ແຕ່ຕົກມາຍຸກປັດຈຸບັນນີ້ ດ້ວຍສະພາບເສດຖະກິດ ສະພາບແວດລ້ອມ ແລະ ຫຼາຍຢ່າງໃນສັງຄົມທີ່ຜັນແປໄປ ເດັກນ້ອຍສ່ວນໃຫຍ່ບໍ່ຢາກທີ່ຈະຮຽນຕໍ່, ບາງຄົນກໍຈຳເປັນຕ້ອງອອກໄປເຮັດວຽກເພື່ອຫາເງິນຊ່ວຍຄອບຄົວ, ຫຼາຍຄົນກໍອອກມາປະກອບກິດຈະການເຮັດທຸລະກິດ ເປັນນາຍຂອງຕົນເອງ ແຕ່ບໍ່ວ່າຈະຢ່າງໃດກໍຕາມ ຖ້າຄົນທີ່ມີເງືອນໄຂກໍຍັງສະໜັບສະໜູນໃຫ້ຮຽນຕໍ່ສາຍວິຊາຊີບໃຫ້ຈົບຈະເປັນການດີທີ່ສຸດ.

ຍຸກນີ້! ຕ້ອງອວດກັນປະຢັດ

ເມື່ອສັງຄົມເຮົາກ້າວເຂົ້າສູ່ຍຸກທີ່ເຂົ້າຍາກມາກແພງ ຫຼາຍຄົນ “ຫາເຊົ້າກິນເຊົ້າ” ບໍ່ແມ່ນ “ຫາເຊົ້າກິນຄໍ່າ” ຄືແຕ່ກ່ອນແລ້ວ ເຄື່ອງໃຊ້ຂອງສອຍຕ່າງໆ ກໍລ້ວນແຕ່ລາຄາສູງຂຶ້ນເທົ່າຕົວ, ເຮົາຍັງຈະພາກັນມາອວດລວຍໂຊລົດສະນິຍົມດີໆ ໃຊ້ຂອງແພງໆ ກິນອາຫານຫຼູຫຼາ ຕາມຄົນມີລາຍຮັບທີ່ໝັ່ນຄົງ ຫຼື ຄົນຮັ່ງມີບໍ່ໄດ້ແລ້ວ

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.