ເມື່ອຮອດຍາມໜາວວຽນມາ ດອກງິ້ວກໍເລີ່ມເບັ່ງບານ ຊາວເມືອງຕົ້ນເຜິ້ງໄດ້ຈັດສັນດອນທີ່ງົດງາມແຫ່ງນີ້ ໃຫ້ກາຍເປັນສະຖານທີ່ທ່ອງທ່ຽວ ແລະ ເຮັດໃຫ້ດຶງດູດນັກທ່ອງທ່ຽວນັບມື້ນັບຫຼາຍຂຶ້ນ, ປັດຈຸບັນ ໄດ້ມີການກະກຽມງານເທດສະການໃນຮອບ 3 ປີ ຫຼັງຈາກໂຄງວິດລະບາດ ເຊິ່ງຈະຈັດຂຶ້ນໃນລະຫວ່າງວັນທີ 25-29 ມັງກອນ 2023 ທີ່ເມືອງຕົ້ນເຜິ້ງ ແຂວງບໍ່ແກ້ວ.
ສຳລັບກິດຈະກໍາຕົ້ນຕໍຂອງງານເທດສະການດອກງິ້ວບານ ປະກອບມີ: ງານວາງສະແດງສິນຄ້າ, ງານວາງສະແດງຜົນສຳເລັດ, ພິທີເປີດ-ປິດງານເທດສະການດອກງິ້ວບານງານ, ງານປະກວດນາງສາວດອກງິ້ວບານ, ການເດີນໂຊຊຸດວັດທະນະທຳຍິງ-ຊາຍ 13 ຊົນເຜົ່າຂອງແຂວງບໍ່ແກ້ວ, ການສະແດງສິລະປະວັດທະນະທໍາ 4 ປະເທດ: ລາວ ຈີນ ໄທ ມຽນມາ, ທ່ຽວຊົມຕະຫຼາດຈີນ, ກິດຈະກຳຂໍພອນຢູ່ວັດຊົງຊ່ານ, ກິລາຕີມວຍ 3 ປະເທດ: ລາວ ໄທ ຈີນ, ກິດຈະກຳປ່ອຍໂຄມໄຟ, ງານສຳມະນາສົ່ງເສີມການທ່ອງທ່ຽວ – ການລົງທຶນລະຫວ່າງວິສາຫະກິດພາຍໃນ ແລະ ຕ່າງປະເທດ, ກິດຈະກຳເຊັກອິນສະຖານທີ່ທ່ອງທ່ຽວ ແລະ ອື່ນໆ.
ການຈັດງານດັ່ງກ່າວ, ເປັນຄັ້ງທຳອິດທີ່ຈັດປະກວດນາງສາວງາມ 2 ປະເພດ ພ້ອມກັນຄື: ການປະກວດນາງສາວດອກງິ້ວບານ ແລະ ນາງສາວທ່ອງທ່ຽວລາວ, ປັດຈຸບັນ ຜູ້ຮັບຜິດຊອບ ກຳລັງດຳເນີນການຄັດເລືອກນາງສາວງາມ ແລະ ວັນທີ 25 ທັນວາ 2022 ເປັນມື້ສຸດທ້າຍຂອງການຮັບສະໝັກນາງສາວທ່ອງທ່ຽວລາວ.
ງານເທດສະການດອກງິ້ວບານແມ່ນງານບຸນໜຶ່ງຂອງຊາວເມືອງຕົ້ນເຜີ້ງ ທີ່ຈັດຢູ່ດອນຊາວ ໃນເຂດທີ່ມີຈຸດພິເສດທາງດ້ານທີ່ຕັ້ງພູມສາດ ແລະ ທຳມະຊາດທີ່ເປັນເອກະລັກ, ເປັນບໍລິເວນທີ່ມີຊາຍແດນລາວ, ໄທ, ມຽນມາຕິດຈອດກັນ ແລະ ມີຊື່ສຽງໂດ່ງດັງ ນັ້ນກໍຄື “ສາມຫຼ່ຽມຄຳ”.
ທີ່ມາ: ເຂດເສດຖະກິດພິເສດສາມຫຼຽມຄຳ