ນາງ ນ້ອຍ ເລົ່າຈົ່ງຊົວ ໝາຍເລກ M18 ປັດຈຸບັນຢູ່ບ້ານໂພນງາມ ເມືອງແປກ ແຂວງ ຊຽງຂວາງ ອາຍຸ 22 ປີ, ປັດຈຸບັນ ກໍາລັງສຶກສາທີ່ມະຫາວິທະຍາໄລແຫ່ງຊາດ ຄະນະເສດຖະສາດການພັດທະນາ ແລະ ວາງແຜນ ປີທີ 4 ເຊິ່ງໄດ້ເຂົ້າປະກວດນາງສາວມົ້ງ ເພື່ອທີ່ຈະໃຫ້ຊາວໝຸ່ມຫັນມາສົນໃຈຕໍ່ກິດຈະກຳອັນເປັນປະໂຫຍດທັງເປັນການສົ່ງເສີມສີລະປະວັດທະນະທໍາ ແລະ ຮີດຄອງປະເພນີຂອງປະຊາຊົນບັນດາເຜົ່າ ໂດຍສະເພາະຊົນເຜົ່າມົ້ງ.
ການປະກວດນາງສາວມົ້ງລາວປະຈໍາປີ 2023 ຫຼື Miss Hmong Laos 2023 ແມ່ນໄດ້ເລີ່ມຮອບຄັດເລືອກໃນວັນທີ 1 ພະຈິກ ຫາ ວັນທີ 3 ທັນວາ 2022 ຈາກຕົວແທນທົ່ວປະເທດ ແລະ ມາຮອດວັນທີ 3 ມັງກອນ 2023 ແມ່ນແຂ່ງຂັນຮອບຊີງຊະນະເລີດ ທີ່ສະໂມສອນກິລາພື້ນເມືອງ ລາວສໍາພັນ ບ້ານຊໍາເກດ ເມືອງສີໂຄດຕະບອງ ນະຄອນຫຼວງວຽງຈັນ.
ເຊິ່ງຜົນປະກົດວ່າ ຈາກຜູ້ຜ່ານເຂົ້າຮອບທັງໝົດ 24 ຄົນ ນາງ ນ້ອຍ ເລົ່າຈົ່ງຊົວ ໝາຍເລກ M18 ຈາກແຂວງຊຽງຂວາງ ໄດ້ອັນດັບ 1 ນາງສາວມົ້ງລາວ 2023 ໄດ້ມົງກຸດເພັດ ມູນຄ່າ 1 ຮ້ອຍລ້ານກີບ ຈາກຮ້ານຄໍາພູວົງ ໄປຄອງ ພ້ອມເງິນລາງວັນ 15 ລ້ານກີບ, ອັນດັບທີ 2 ໄດ້ແກ່ ນາງ ປ່າເຊ້ຍລີ ລີເຍ່ຍວື ຈາກແຂວງວຽງຈັນ ໄດ້ຮັບເງິນລາງວັນ 10 ລ້ານກີບ ແລະ ອັນດັບທີ 3 ໄດ້ແດ່ນາງ ປ່າຢົ່ງຢ່າງ ຈາກນະຄອນຫຼວງພະບາງ ໄດ້ຮັບເງິນລາງວັນ 8 ລ້ານກີບ.