ເສົາກ໊ວຍເປັນພືດຊະນິດໜຶ່ງ ມີຄວາມສູງປະມານ 15-100 ຊັງຕີແມັດ ໃບມີຮູບຊົງຄ້າຍຄືກັບຢົດນໍ້າ ຕົ້ນເສົາກ໊ວຍ ມີຕົ້ນກຳເນີດມາຈາກປະເທດຈີນ, ເຊິ່ງເສົາກ໊ວຍ ຫຼື ວຸ້ນດຳ ທີ່ຫຼາຍຄົນມັກກິນ ໃສ່ກັບນ້ຳໂອລ້ຽງຣົດຊາດຕ່າງໆ ຕາມຕະຫຼາດ ຫຼື ໃສກັບຊານົມນັ້ນ ໄດ້ມາຈາກຫຍ້າເສົາກ໊ວຍ ເຊິ່ງມື້ນີ້ເຮົາມີວິທີເຮັດເສົາກ໊ວຍ ຈາກແມ່ຄ້າມາຝາກກັນ.
ຈາກການສອບຖາມ ແມ່ນາງ ເຈົ້າຂອງຮ້ານຂາຍນ້ຳ ຢູ່ຕະຫຼາດພະຂາວ ເວົ້າວ່າ: ສຳລັບການປ່ຽນຕົ້ນເສົາກ໊ວຍ ໃຫ້ກາຍມາເປັນວຸ້ນເສົາກ໊ວຍ ຫຼື ວຸ້ນດຳ ທີ່ສາມາດກິນໄດ້ນັ້ນ ຈະໃຊ້ຕົ້ນເສົາກ້ວຍແຫ້ງ ເຊິ່ງມີສ່ວນປະສົມຄື: ຕົ້ນເສົາກ໊ວຍ 150 ກຣາມ, ແປ້ງມັນ 125 ກຣາມ, ນ້ຳ 2,500 ກຣາມ ແລະ ນ້ຳສຳລັບລະລາຍແປ້ງ 125 ກຣາມ.
ວິທີເຮັດງ່າຍໆຄື: ໃຫ້ນຳຕົ້ນເສົາກ໊ວຍແຫ້ງ ທີ່ລ້າງໃຫ້ສະອາດ ແລ້ວນຳໄປຕົ້ມກັບນ້ຳຈົນຟົດ ໃຊ້ເວລາປະມານ 2-3 ຊົ່ວໂມງ ຈົນໃຫ້ນໍ້າເປັນສີດໍາໜຽວ, ຈາກນັ້ນຕອງເອົາຕົ້ນອອກ ໃຫ້ເຫຼືອແຕ່ນ້ຳ ແລ້ວປະສົມແປ້ງມັນລົງໄປ ໃນອັດຕາ ນ້ຳເສົາກ໊ວຍ 9 ສ່ວນ ແລະ ແປ້ງມັນ 2 ສ່ວນ, ຄົນໃຫ້ເຂົ້າເປັນເນື້ອດຽວກັນ ໃຊ້ເວລາປະມານ 1 ຊົ່ວໂມງ, ເມື່ອຄົນເຂົ້າກັນແລ້ວ ໃຫ້ນໍານໍ້າເສົ້າກ໊ວຍເທໃສ່ຖາດ ປະໄວ້ໃຫ້ເຢັນ ແລ້ວນຳມາຕັດຕາມຕ້ອງການ ກໍຈະໄດ້ເສົາກ໊ວຍທີ່ສາມາດກິນໄດ້ແລ້ວ.
ໃຜທີ່ສົນໃຈຢາກລອງເຮັດ ເສົາກ໊ວຍກິນເອງຢູ່ໃນເຮືອນ ກໍສາມາດນຳວິທີນີ້ ໄປລອງເຮັດກັນເບິ່ງໄດ້ເດີ.