ສຳລັບສາວໆຄົນໃດທີ່ໄດ້ຮັບດອກກຸຫຼາບຈາກແຟນ ໃນວັນແຫ່ງຄວາມຮັກ ແລ້ວຢາກເກັບດອກກຸຫຼາບແຫ່ງຄວາມປະທັບໃຈນີ້ໄວ້ໃຫ້ດົນທີ່ສຸດ ມື້ນີ້ເຮົາມີໂອກາດໄດ້ສອບຖາມ ສອງສາວ ທີ່ແຟນໄດ້ມອບດອກກຸຫຼາບໃຫ້ ໃນວັນແຫ່ງຄວາມຮັກ ຫຼື ວັນທີ່ 14 ກຸພາ ທີ່ຜ່ານມານີ້ ວ່າເພີ່ນມີວີທີ ໃນການເກັບຮັກສາດອກໄມ້ ແຫ່ງຄວາມປະທັບໃຈນີ້ໄວ້ໃຫ້ດົນ ດ້ວຍວິທີໃດ ໄປເບິ່ງນຳກັນເລີຍ.
ນາງ ຈັນສຸດາ ເວົ້າວ່າ: ຈະມັກອົບດອກກຸຫຼາບ ໃນໄມໂຄເວບ ເມື່ອເຮົາວາງດອກກຸຫຼາບໄວ້ດົນ ຈົນດອກກຸຫຼາບບານພໍແລ້ວ ກໍຈະແກະເອົາກີບດອກກຸຫຼາບອອກມາ, ນຳຜ້າຂົນໜູໄວ້ເທິງຖາດທີ່ຢູ່ໃນເຕົາໄມໂຄເວບ ແລ້ວວາງກີບດອກກຸຫຼາບລົງເທິງຜ້າ ຈັດໃຫ້ເປັນລະບຽບບໍ່ໃຫ້ທັບກັນ ຫຼັງຈາກນັ້ນກໍເອົາຜ້າຂົນໝູທັບກີບດອກກຸຫຼາບ ອີກເທື່ອໜຶ່ງ ແລ້ວເປີດໄຟໄມໂຄເວບໃຫ້ແຮງສຸດ ອົບປະມານ 2 ນາທີ ໂດຍພິກກັບດ້ານທຸກໆ 30 ວິນາທີ, ເພື່ອໃຫ້ດອກກຸຫຼາບແຫ່ງທົ່ວກັນທຸກກີບ ແຕ່ໃນຕອນສະໄໝຮຽນ ແມ່ນຈະມັກທັບດອກກຸຫຼາບ ໃສ່ໃນປື້ມຕຳລາເພື່ອໃຫ້ ດອກກຸຫຼາບຂອງເຮົາແຫ້ງເອງ.
ນາງ ຄຳມີ ເວົ້າວ່າ: ຈະມັກເຮັດດອກກຸຫຼາບແຫ້ງໄວ້ ໂດຍການມັດດອກກຸຫຼາບໄວ້ລວມກັນ ປະມານ 5-10 ດອກເຮັດເປັນມັດໜຶ່ງ ເພື່ອເຮັດໃຫ້ແຫ້ງໄວຂຶ້ນ ແລ້ວນຳເອົາດອກກຸຫຼາບທີ່ມັດລວມກັນໄວ້ ຫ້ອຍດອກກຸຫຼາບລົງທາງລຸ່ມ ອາດຈະໃຊ້ເວລາເປັນອາທິດ ກວ່າດອກກຸຫຼາບຈະແຫ້ງ ແຕ່ເມື່ອມັນແຫ້ງແລ້ວ ກໍຈະເຫັນໄດ້ວ່າເປັນດອກກຸຫຼາບທີ່ງົດງາມ ແລະ ຍັງຄົງຮູບຊົງເດີມ ສາມາດເກັບໃສ່ໂຖໄວ້ໄດ້ດົນເລີຍ.
ແລ້ວສາວໆ ມີວິທີຮັກສາດອກໄມ້ ແຫ່ງຄວາມຮັກນີ້ໄວ້ແນວໃດ ໃຫ້ໄດ້ດົນທີ່ສຸດ ສາມາດມາແນະນຳບອກຕໍ່ກັນໄດ້, ແຕ່ຖ້າຫາກຍັງບໍ່ມີວິທີ ລອງນໍາເອົາວິທີຈາກສອງສາວນີ້ ໄປປະຕິບັດກັນເບິ່ງໄດ້ເດີ.