ສະໄໝນີ້ ໂທລະສັບຫຼາຍລຸ້ນກໍມີຄຸນສົມບັດກັນນໍ້າໄດ້ລະດັບໜຶ່ງແລ້ວ ເຮົາອາດຈະເລືອກຊື້ຮຸ່ນທີ່ກັນນໍ້າໄດ້ຖ້າຫາກຢາກຫາຍຫ່ວງຈາກປັນຫາການເປ່ເພຈາກການປຽກນໍ້າ ຫຼື ຖ້າຍັງບໍ່ຢາກປ່ຽນ ແຕ່ເກີດກໍລະນີທີ່ໂທລະສັບເຮົາຕົກນໍ້າໃນຊ່ວງປີໃໝ່ ກໍລອງເອົາວິທີທີ່ເຮົາແນະນຳນໍາໄປໃຊ້ໄດ້.
- ເອົາໂທລະສັບມືຖືອອກຈາກນໍ້າໃຫ້ໄວທີ່ສຸດ ແລ້ວປິດໄວ້. ຢ່າທົດລອງເປີດຢ່າງເດັດຂາດ ເພາະນໍ້າທີ່ເຂົ້າໄປດ້ານໃນຂອງເຄື່ອງອາດເຮັດໃຫ້ເກີດໄຟຟ້າລັດວົງຈອນ ແລະ ເພໄດ້.
- ຍິ່ງເອົາມືຖືອອກຈາກນໍ້າທີ່ເຮັດໃຫ້ປຽກໄດ້ໄວເທົ່າໃດ ໂທລະສັບມືຖືກໍຍິ່ງມີໂອກາດລອດຫຼາຍເທົ່ານັ້ນ.
- ຫຼັງຈາກເອົາໂທລະສັບຂຶ້ນຈາກນໍ້າແລ້ວ ໃຫ້ແກະແບັດເຕີຣີອອກ ແລະ ວາງໄວ້ເທິງເຈ້ຍອະນາໄມ ຫຼື ຜ້ານຸ້ມໆເພື່ອດູດຊັບເອົານໍ້າອອກ.
- ຖອດອຸປະກອນເສີມທີ່ຖອດໄດ້ທຸກຢ່າງອອກ ເຊັ່ນ: ເຄສ, ໜ່ວຍຄວາມຈຳເສີມ MicroSD card, ຊິມກາດ ລວມເຖິງຝາອັດຮູຕ່າງໆຂອງໂທລະສັບ ຖ້າຫາກວ່າມີ ເພື່ອໃຫ້ເຄື່ອງແຫ້ງໄວຂຶ້ນ.
- ເຊັດຕົວເຄື່ອງດ້ວຍຜ້ານຸ້ມໆທີ່ສາມາດດູດຊັບນໍ້າໄດ້ດີ ແຕ່ຫ້າມສັ່ນໂທລະສັບເດັດຂາດ ເພາະອາດເຮັດໃຫ້ນໍ້າເຄື່ອນທີ່ເຂົ້າໄປຊິ້ນສ່ວນດ້ານໃນຂອງເຄື່ອງຫຼາຍຂຶ້ນ.
- ໃຊ້ເຄື່ອງດູດຝຸ່ນດູດເອົານໍ້າອອກຈາກໂທລະສັບ ກໍສາມາດຊ່ວຍໄດ້ຫຼາຍ ແຕ່ຢ່າເອົາປາຍເຄື່ອງດູດຝຸ່ນເຂົ້າໃກ້ໂຕເຄື່ອງຫຼາຍເກີນໄປ ເພາະອາດເຮັດໃຫ້ເກີດຄວາມເສຍຫາຍກັບຕົວເຄື່ອງໄດ້.
- ຫ້າມໃຊ້ເຄື່ອງເປົ່າຜົມເພື່ອເຮັດໃຫ້ໂທລະສັບແຫ້ງຢ່າງເດັດຂາດ ເຖິງວ່າຈະເປັນໂໝດລົມເຢັນກໍຕາມ ເພາະອາດເຮັດໃຫ້ນໍ້າເຂົ້າໄປຍັງຊິ້ນສ່ວນພາຍໃນໄດ້ຫຼາຍຂຶ້ນ ແລະ ສ້າງຄວາມເສຍຫາຍກັບຕົວເຄື່ອງໄດ້.
- ໃຊ້ວັດສະດຸທີ່ສາມາດດູດຊັບຄວາມຊື້ນຊ່ວຍເຊັ່ນ: ເມັດດູດຄວາມຊື້ນ (ທີ່ຢູ່ໃນຖົງເຂົ້າໜົມ ເປັນຕົ້ນ) ຫຼື ເຂົ້າສານກໍສາມາດຊ່ວຍໄດ້ ແຕ່ຖ້າເປັນໄປໄດ້ໃຊ້ເມັດດູດຄວາມຊື້ນຈະໄດ້ຜົນດີກວ່າ.
- ວາງມືຖືໄວ້ບ່ອນທີ່ມີແສງ ແຕ່ບໍ່ຄວນຮ້ອນເກີນໄປ.
- ວາງມືຖືໄວ້ເທິງຜ້ານຸ້ມໆທີ່ດູດຊັບນໍ້າໄດ້ດີ ຫຼື ວັດສະດຸອື່ນທີ່ຄ້າຍຄືກັນ.
- ເມື່ອໝັ້ນໃຈວ່າມືຖືແຫ້ງດີແລ້ວກໍປະກອບແບັດ ແລະ ຊິ້ນສ່ວນອື່ນໆເຂົ້າກັນ ແລ້ວລອງເປີດເຄື່ອງເບິ່ງ ຖ້າຫາກເຄື່ອງເປີດແລ້ວໃຊ້ງານໄດ້ປົກກະຕິ ກໍຖືວ່າລອດໄປ. ຖ້າຫາກເຄື່ອງເປີດບໍ່ຂຶ້ນໃຫ້ລອງຖອດແບັດອອກແລ້ວ ສຽບສາຍສາກໃສ່ມືຖື ຖ້າຫາກເຄື່ອງເປີດຂຶ້ນໄດ້ ສະແດງວ່າແບັດຕາຍ ແລະ ຕ້ອງປ່ຽນແບັດໃໝ່.
- ຖ້າຫາກເຄື່ອງເປີດບໍ່ຂຶ້ນເລີຍ ທ່ານອາດຕ້ອງໄດ້ໃຊ້ບໍລິການສ້ອມແປງຈາກຕົວແທນຈຳໜ່າຍທີ່ໄດ້ຮັບການຮັບຮອງ ຫ້າມແກະເຄື່ອງສ້ອມແປງເອງດັດຂາດ ເພາະອາດເຮັດໃຫ້ເປ່ເພຫຼາຍກວ່າເກົ່າ.