ພິທີເຊັນບົດບັນທຶກການຮ່ວມມື ພັດທະນາໂຄງການທາງດ່ວນຈາກນະຄອນຫລວງວຽງຈັນ ຫາຊາຍແດນ ສປປ ລາວ ກັບ ສປ ຈີນ (ດ່ານສາກົນບໍ່ເຕັນ-ບໍ່ຫານ), ໄດ້ຈັດຂຶ້ນໃນວັນທີ 28 ພຶດສະພາ 2019 ທີ່ນະຄອນຫລວງວຽງຈັນ ລະຫວ່າງ ທ່ານ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະການລົງທຶນ ແລະ ທ່ານ ເສິນ ເວີນຊານ ປະທານກຸ່ມບໍລິສັດ ກໍ່ສ້າງ-ລົງທຶນ ແລະຖືຮຸ້ນແຂວງຢຸນນານ ຈໍາກັດ ໂດຍມີ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີ ກະຊວງກະຊວງການເງິນ, ທ່ານ ຣວນ ເສີງຟາ ເຈົ້າແຂວງຢຸນນານ, ທ່ານ ຈຽງ ຈາຍດົງ ເອກອັກຄະລັດຖະທູດ ແຫ່ງ ສປ ຈີນ ປະຈໍາ ລາວ ພ້ອມດ້ວຍພາກສ່ວນກ່ຽວຂ້ອງ ຂອງສອງຝ່າຍເຂົ້າຮ່ວມເປັນສັກຂີພິຍານ.
ໂຄງການທາງດ່ວນ ຈາກນະຄອນຫລວງວຽງຈັນ ຫາຊາຍແດນ ສປປ ລາວ ກັບ ສປ ຈີນ ຖືເປັນຜົນຮູບປະທໍາ ຂອງການປະສານກັນລະຫວ່າງການລິເລີ່ມ “ໜຶ່ງແລວທາງໜຶ່ງເສັ້ນທາງ” ແລະ ຍຸດທະສາດລະດັບຊາດ “ຫັນປ່ຽນຈາກປະເທດບໍ່ມີທາງອອກສູ່ທະເລ ໃຫ້ກາຍເປັນ ປະເທດທາງເຊື່ອມຕໍ່” ຂອງລາວ. ໂດຍພາຍຫລັງທີ່ການກໍ່ສ້າງສໍາເລັດ ການເດີນທາງຈາກນະຄອນຫລວງວຽງຈັນ ຫາດ່ານບໍ່ເຕັນ ໃຊ້ເວລາແຕ່ 6 ຊົ່ວໂມງ ເຊິ່ງຈະປະຢັດເວລາໄປໄດ້ 14 ຊົ່ວໂມງ ເມື່ອປຽບທຽບໃສ່ປະຈຸບັນນີ້ ແລະ ສາມາດເດີນທາງຈາກນະຄອນຫລວງວຽງຈັນ ຮອດເມືອງຄຸນມິງ ແຂວງຢຸນນານ ໄດ້ພາຍໃນມື້ດຽວກັນ, ເຊິ່ງຈະເພີ່ມທະວີຄວາມຮ່ວມມືແລກປ່ຽນທາງດ້ານເສດຖະກິດການຄ້າລະຫວ່າງລາວກັບຈີນ, ສົ່ງເສີມການພັດທະນາເສດຖະກິດ ແລະສັງຄົມໃນລາວ ແລະບັນດາແຂວງພາກຕາເວັນຕົກສ່ຽງໃຕ້ຂອງຈີນ.
ສະເພາະ ການກໍ່ສ້າງໂຄງການດັ່ງກ່າວ ມີແຜນດໍາເນີນປະຕິບັດ 4 ຂັ້ນຕອນຄື: ນະຄອນຫລວງວຽງຈັນ ຫາ ວັງວຽງ, ວັງວຽງ ຫາ ຫລວງພະບາງ, ຫລວງພະບາງ ຫາ ອຸດົມໄຊ ແລະ ອຸດົມໄຊ ຫາ ດ່ານສາກົນບໍ່ເຕັນ. ປະຈຸບັນ ຊ່ວງນະຄອນຫລວງວຽງຈັນ ຫາ ວັງວຽງ ແມ່ນໄດ້ເຂົ້າສູ່ການລົງມືກໍ່ສ້າງແລ້ວ, ສ່ວນຊ່ວງທີ່ຍັງເຫລືອ ແມ່ນກໍາລັງດໍາເນີນວຽກງານການສຶກສາສໍາຫລວດຄວາມເປັນໄດ້ໃນການກໍ່ສ້າງ ໂດຍລວມໂຄງກໍາລັງດໍາເນີນໄປໄດ້ດີຕາມຄວາມຄາດຫວັງ.