ເສັ້ນທາງລົດໄຟລາວ-ຈີນ ນັບວ່າເປັນເສັ້ນທາງສຳຄັນທີ່ມີການເວົ້າເຖິງຫຼາຍ ຢູ່ໃນມົນທົນຢູນານຂອງຈີນ ເນື່ອງດ້ວຍຫຼາຍປັດໃຈຫຼາຍໆຢ່າງນັບຕັ້ງແຕ່ ຄວາມສາມາດໃນການພັດທະນາເສດຖະກິດໃນພາກພື້ນອາຊີ ໄປຈົນຮອດ ຄວາມຈິງໃຈຂອງຈີນ ທີ່ມີຕໍ່ ສປປ ລາວ
ຕະຫຼອດເສັ້ນທາງລົດໄຟຄວາມຍາວເກືອບພັນກິໂລແມັດ ຍາວຕັ້ງແຕ່ ຄຸນໝິງ ຜ່ານເມືອງ ຢູຊິ (Yuxi) ມົນທົນຢູນານ ມາຮອດ ເສດຖະກິດພິເສດບ່ໍເຕັນ-ບໍ່ຫານ ຊາຍແດນລາວ (556 ກິໂລແມັດ) ກ່ອນຈະຜ່ານຊາຍແດນເຂົ້າເມືອງບໍ່ເຕັນ ແຂວງຫຼວງນໍ້າທາ ຈົນຮອດນະຄອນຫຼວງວຽງຈັນ ( 414 ກິໂລແມັດ) ບໍ່ພຽງແຕ່ຈະສ້າງຄວາມໜ້າຕື່ນຕາຕື່ນໃຈ ຂອງໂຄງການກໍ່ສ້າງຂະໜາດໃຫຍ່ 6 ພັນລ້ານໂດລາສະຫະລັດ ເທົ່ານັ້ນ ແຕ່ຍັງສ້າງຄວາມທ້າທາຍໃນອີກຫຼາຍໆດ້ານ ຕໍ່ຄວາມສຳພັນ ລາວ-ຈີນ ແລະ ອາຊີຕາເວັນອອກສຽງໃຕ້
“ການສ້າງທາງລົດໄຟ ລາວ-ຈີນ ເປັນໜຶ່ງໃນໂຄງການ Belt and Road Initiative (BRI) ແລະ ຄວາມສຳພັນລະຫວ່າງຈີນແລະລາວ” ລາຍງານຈາກເວັບ South China Morning Post ໄດ້ບອກວ່າ ປ້າຍແຫ່ງໜຶ່ງຂອງໂຄງການ ໂຄງການໃນເມືອງຢູຊິ ( Yuxi ) ຂຽນໄວ້ແບບນັ້ນ, ໃນຂະນະທີ່ປ້າຍໂຄງການໃນລາວ ຂຶ້ນຂໍ້ຄວາມວ່າ “ຮ່ວມເສັ້ນທາງ ລາວ-ຈີນ ໃຫ້ສຳເລັດເປັນຢ່າງດີ ເພື່ອນໍາເອົາຜົນປະໂຫຍດໃຫ້ແກ່ປະຊາຊົນສອງຊາດ”
ຊູ ລີປິງ ( Xu Liping ) ຜູ້ຊ່ຽວຊານດ້ານຕາເວັນອອກສຽງໃຕ້ ຈາກສະຖາບັນຍຸດທະສາດນານາຊາດ ປະເທດ ສປ ຈີນ ໄດ້ກ່າວເຖິງໂຄງການນີ້ໄວ້ວ່າ ໃນບັນດາໂຄງການທາງລົດໄຟພາກພື້ນນີ້ ເຊິ່ງປະກອບດ້ວຍອີກ 2 ເສັ້ນທາງ ຄືທາງຕາເວັນອອກໄປທາງຫວຽດນາມ ແລະ ທາງຕາເວັນຕົກໄປທາງມຽນມາ ເສັ້ນທາງໃນ ສປປ ລາວ ນັບເປັນເສັ້ນທາງທີ່ຍາກທີ່ສຸດເພາະສະພາບພູມມິປະເທດເປັນພູສະຫຼັບສັບຊ້ອນ ແລະຍັງມີເສດຖະກິດນ້ອຍກວ່າທັງສອງເສັ້ນທາງ ເພາະຖືກວາງເປັນເສັ້ນທາງຂະຫຍາຍເພື່ອເຊື່ອມ ຄຸນໝິງ ໄປສິງກະໂປໃນອະນາຄົດ ແຕ່ວ່າເປັນໂຄງການທີ່ມີຄວາມເປັນໄປໄດ້ທີ່ຈະດຳເນີນການຫຼາຍກວ່າ ເນື່ອງຈາກລັດຖະບານມີສະຖຽນລະພາບສູງ
10 ເດືອນທີ່ລໍຖ້າການພິສູດ
ດຣາກັນ ພາຟລິເຊວິກ ( Dragan Pavlicevic ) ຜູ້ຊ່ວຍສາສະດາຈານຈີນສຶກສາ ມະຫາວິທະຍາໄລ ຊຽນ ຈຽວຕົງ-ລິເວີພູ ສະແດງຄວາມຄິດເຫັນເຖິງໂຄງການໃນພາກພື້ນອາຊີຕາເວັນອອກສຽງໃຕ້ນີ້ວ່າ ຈີນຍັງຕ້ອງຕໍ່ສູ້ກັບກະແສດ້ານລົບ ທີ່ເກີດຂຶ້ນໃນການຖືກເບິ່ງວ່າ ເປັນການສ້າງກັບດັກໜີ້ໃຫ້ປະເທດທີ່ເຂົ້າໄປລົງທຶນ ແລະ ສ່ວນຫຼາຍບໍ່ເປັນການສ້າງງານໃຫ້ຄົນທ້ອງຖິ່ນ ອັນເປັນສາເຫດເຮັດໃຫ້ໂຄງການລ່າຊ້າໃນທີ່ສຸດ
ເຊັ່ນດຽວກັບໃນ ສປປ ລາວ ເຊິ່ງເປັນໂຄງການທີ່ຄາດຫວັງວ່າ ຈະປ່ຽນລາວຈາກປະເທດທີ່ບໍ່ມີທາງອອກສູ່ທະເລ ( Landlocked ) ເປັນປະເທດທີ່ເຊື່ອມຕໍ່ທັງພາກພື້ນນີ້ ( Land-linked ) ເຂົ້າໄວ້ດ້ວຍກັນ ເຊິ່ງກໍ່ມີການຕັ້ງຂໍ້ສັງເກດເຖິງໂຄງການທາງລົດໄຟ ລາວ-ຈີນ ຢຸ່ບໍ່ໜ້ອຍ ເຖິງຂໍ້ມູນຈາກສຳນັກຂ່າວວຽງຈັນທາຍຈະບອກວ່າ ເມື່ອໂຄງການນີ້ເລີ່ມເປີດໃຫ້ບໍລິການ ຈະສ້າງງານໃຫ້ຄົນລາວບໍ່ໜ້ອຍກວ່າ 600 ຕໍາແໜ່ງກໍ່ຕາມ
ພາຟລິເຊວິກ ກ່າວຕື່ມອີກວ່າ: ຄວາມທ້າທາຍຂອງຈີນ ໃນຂະນະນີ້ ຄືເປັນການໃຫ້ອາຊຽນປະເມີນໂຄງການຂອງຈີນໃໝ່ ແລະ ຄົ້ນຫາເຖິງຄວາມເປັນໄປໄດ້ທີ່ຈະພັດທະນາໂຄງການພື້ນຖານທາງລົດໄຟ ເພື່ອສ້າງໂອກາດໃຫ້ກັບບໍລິສັດຂອງຈີນ ແລະ ຍັງສ້າງຄວາມສຳພັນອັນດີລະຫວ່າງຈີນແລະປະເທດທີ່ໄປລົງທຶນນຳ ໃນເວລາດຽວກັນ
ບໍ່ພຽງແຕ່ຄວາມທ້າທາຍດ້ານຄວາມສຳພັນລະຫວ່າງປະເທດ ແລະ ການສ້າງງານພາຍໃນປະເທດເທົ່ານັ້ນ ໂຄງການນີ້ຍັງມີຄວາມທ້າທາຍໃນດ້ານວິສະວະກຳ ເຊິ່ງເນື່ອງມາຈາກ ມີອຸໂມງຕ້ອງຂຸດເຈາະຫຼາຍເຖິງ 168 ແຫ່ງ ໂດຍ 72 ແຫ່ງໃນຈຳນວນນີ້ເປັນພູເຂົາທີ່ທ້າທາຍການຂຸດເຈາະເປັນຢ່າງຍິ່ງ ເຊິ່ງຍັງບໍ່ນັບຂົວອີກເປັນຮ້ອຍທີ່ຕ້ອງຕໍ່ເຂົ້າດ້ວຍກັນ
ຫາກລົດໄຟລາວ-ຈີນ ປະສົບຜົນສຳເລັດຕາມທີ່ຫວັງໄວ້ ຈະເປັນອີກໃບປະກາດຄວາມຍິ່ງໃຫຍ່ຂອງຈີນໄດ້ອີກໂຄງການໜຶ່ງ ໃຫ້ນານາຊາດຍອມຮັບຈີນຫຼາຍຂຶ້ນໃນລະດັບໂລກ ໃນຖານະຜູ້ຍົກລະດັບເຄືອຂ່າຍການຂົນສົ່ງໃນລະດັບພາກພື້ນ
ຢ່າງໃດກໍ່ຕາມ ຈີນຍັງຕ້ອງດຳເນີນໂຄງການຄູ່ຂະໜານເພື່ອຕອບຄຳຖາມອີກຫຼາຍດ້ານເຊັ່ນ: ຜົນກະທົບດ້ານສິ່ງແວດລ້ອມ ແລະ ປະໂຫຍດໃນທາງເສດຖະກິດທີ່ຈະເກີດຂຶ້ນກັບ ສປປ ລາວ ຫຼາຍກວ່າ ການເກັບລາຍໄດ້ໃນການຜ່ານທາງ ລວມເຖິງຄວາມເປັນໄປໄດ້ ທີ່ຈະພັດທະນາປະເທດລາວໃຫ້ກ້າວໜ້າຕໍ່ໄປ ໃນອະນາຄົດ