Monday, July 15, 2024
Lenovo

ມາຮູ້ຈັກ! ນັດດາວ ສາວສຽງໃສ ຈາກ ຫຼວງນ້ຳທາ.

ຫຼາຍຄົນຄົງຈະຄຸ້ນຫູກັນດີກັບເພງ “ແພງອ້າຍ” ທີ່ມີນັກຮ້ອງສາວສຽງໃສ ນັດດາວ ຮ້ອງຮ່ວມກັບ “ລູກເຂີຍໃສ່ມອງ” ທີ່ຍອດວິວຕອນນີ້ທະລຸເກືອບ 200 ລ້ານວິວແລ້ວ, ແຕ່ສິ່ງທີ່ຫຼາຍຄົນສົງໃສວ່າ ນັດດາວ ສາວນ້ອຍໄວ 20 ປີ ຄົນນີ້ ມາຮ່ວມງານກັບ ລູກເຂີຍໃສ່ມອງ ໄດ້ແນວໃດ ແລະ ເຂົາເຄີຍມີຜົນງານເພງຫຍັງມາແດ່?

ນັດດາວ ທອນບັນດິດ, ເກີດຢູ່ບ້ານ ວຽງເງິນ, ເມືອງ ແລະ ແຂວງ ຫຼວງນ້ຳທາ ເຂົາເລີ່ມເປັນທີ່ຮູ້ຈັກຂອງຄົນໃນສັງຄົມຈາກເພງ “ແພງອ້າຍ” ທີ່ເຮັດໃຫ້ໄປໄກເຖິງປະເທດເພື່ອນບ້ານ.

ນັດດາວ ບອກກັບ ອິນໄຊລາວ ວ່າ ເມື່ອ 3 ກ່ອນ ຕອນທີ່ເຂົາຫາກໍຈົບມໍປາຍ ແຕ່ຍັງບໍ່ທັນໄດ້ຮຽນຕໍ່ໃສເທື່ອ ຕອນນັ້ນ, ກໍກຳລັງຫາວຽກເຮັດໄປກ່ອນເພື່ອຂັ້ນເວລາ ກໍບໍ່ໄດ້ຕັ້ງໃຈວ່າວຽກທີ່ຫາຢູ່ນັ້ນຈະໄດ້ໄປເປັນນັກຮ້ອງ; ມື້ນັ້ນ, ໄປຫຼີ້ນກັບໝູ່ ເປັນຮ້ານທີ່ມີໂຟກຊ່ອງ ແລ້ວໝູ່ບອກຂຶ້ນໄປຮ້ອງເພງໃຫ້ຟັງກໍຂຶ້ນໄປຮ້ອງ ປາກົດວ່າມີຫຼາຍຄົນມັກ ແລ້ວຕົວນ້ອງເອງກະມັກຮ້ອງເພງຢູ່ແລ້ວ ຮູ້ສຶກວ່າຕື່ນເຕັ້ນດີ ແລະ ຄິດວ່າຖ້າໄດ້ຮ້ອງເພງໃຫ້ທຸກຄົນຟັງແລ້ວເຂົາເຈົ້າມັກເຮົາກໍມີຄວາມສຸກແລ້ວ.

ເລີຍຖາມມືກີຕ້າວ່າ ມີນັກຮ້ອງຍິງລະບໍ? ເຂົາເຈົ້າຕອບວ່າຍັງບໍ່ມີ ນ້ອງກໍເລີຍເວົ້າຫຼີ້ນແກມແທ້ກັບອ້າຍຄົນນັ້ນວ່າ ຝາກເນື້ອຝາກຕົວໄວ້ພິຈາລະນາແດ່ເດີ ແຕ່ນ້ອງຊ້ຳພັດເຂົ້າຕາເຈົ້າຂອງຮ້ານພໍດີ ລາວມັກສຽງຮ້ອງເພງຂອງນ້ອງ ຈາກນັ້ນມາກໍໄດ້ເປັນນັກຮ້ອງໂຟກຊ່ອງ ຢູ່ຮ້ານອາຫານ ແລ້ວກໍເລີ່ມມີຄົນຮູ້ຈັກ ແລະ ເວົ້າຮອດຕໍ່ໆກັນມາ ເລີ່ມມີຫຼາຍໆ ຮ້ານມາຈ້າງໃຫ້ໄປຮ້ອງເພງ ແລະ ນ້ອງກໍໄປຮ້ອງຢູ່ຫຼາຍຮ້ານສົມຄວນ.

ຕໍ່ມາມີລຸ້ນອ້າຍທີ່ຮັກມັກໃນການຮ້ອງເພງລາວ ເຫັນແວວກໍລອງຊວນມາເຮັດເພງຫຼິ້ນໆນຳ ຕອນນັ້ນ ເພງທຳອິດແມ່ນເພງ ເປັນພຽງຝຸ່ນ ປ່ອຍອອກໄປ ບໍ່ຄິດວ່າຈະໄດ້ຜົນຕອບຮັບດີ  ວິວຂຶ້ນແຕະ 1 ລ້ານວີວ.

ແລະ ກໍເລີ່ມມີເພງທີສອງອອກມາຕິດໆ ເປັນເພງ ຖາມຈັກຄຳ ເພງນີ້ເຮັດໃຫ້ຍອດວິວຂຶ້ນຫຼາຍກວ່າເກົ່າອີກ ປັດຈຸບັນເພງນີ້ກໍເກືອບ 10 ລ້ານວີວແລ້ວ ຖືໄດ້ວ່າເພງນີ້ ເປັນຈຸດປ່ຽນຂັ້ນທຳອິດຂອງນ້ອງເລີຍກໍວ່າໄດ້ ເລີ່ມມີຄົນຮູ້ຈັກ ແລະ ເລີ່ມມີວຽກຕິດຕໍ່ເຂົ້າມາ, ເລີ່ມມີຄົນມອບໂອກາດດີໆໃຫ້.

ນັດດາວ ບອກວ່າ ອ້າຍໂສພະນາ ກໍເປັນອີກຄົນທີ່ຕິດຕໍ່ມາວ່າ ມີໂປຣເຈັກຢາກໃຫ້ຮ່ວມຮ້ອງເພງນຳ ກະຄືເພງ ແພງອ້າຍ ນ້ອງກະຕອບຕົກລົງ ແລ້ວຂຶ້ນມານະຄອນຫຼວງ ວຽງຈັນ ທັນທີ ສໍາລັບເພງນີ້ແລ້ວໃຊ້ເວລາພຽງແຕ່ 3 ມື້ ໃນການຖ່າຍເອັມວີ ຈາກນັ້ນກໍກະປ່ອຍລົງຢູທູບເລີຍ.

ສຳລັບການທີ່ໄດ້ມາຮ້ອງເພງນີ້ກະບໍ່ໄດ້ຄາດຫວັງຫຍັງຫຼາຍ ວ່າຜົນຕອບຮັບມັນຈະເປັນແນວໃດ ນ້ອງຄິດວ່າພຽງແຕ່ໄດ້ຮ້ອງເພງກັບ ອ້າຍໂສພະນາ ກໍດີໃຈຫຼາຍແລ້ວ ແຕ່ພໍປ່ອຍເພງນີ້ອອກໄປ ກໍໄດ້ສຽງຕອບຮັບດີຫຼາຍ ປັດຈຸບັນ ຍອດວິວກໍເກືອບ 200 ລ້ານວິວແລ້ວ ບາງເທື່ອນ້ອງກະຍັງຄິດຢູ່ວ່າໂຕເອງຝັນໄປຢູ່ເບາະ ຈາກນັກຮ້ອງແລ່ນຮັບຈ້າງຮ້ອງເພງຕາມຮ້ານມື້ນັ້ນສູ່ນັກຮ້ອງ 100 ລ້ານວິວ ໃນມື້ນີ້.

“ມັນເປັນອີຫຍັງທີ່ນ້ອງຕື້ນຕັນໃຈອີຫຼີ ແລ້ວເພງ ແພງອ້າຍ ນີ້ກະເປັນຈຸດປ່ຽນໃນຊີວິດຂອງນ້ອງໃຫ້ກ້າວຂຶ້ນໄປອີກຂັ້ນ ມັນໄດ້ພານ້ອງໄປຮອດລາຍການຊຸບເປີ້ໝ່ຳ ເຊິ່ງລາຍການທີ່ມີຊື່ສຽງ ແລະ ມີຄົນນິຍົມເບິ່ງຫຼາຍຂອງໄທ” ນັດດາວ ກ່າວດ້ວຍຄວາມດີໃຈ.

ການໄດ້ອອກລາຍການຊຸບເປີໝ່ຳ ນ້ອງຮູ້ສຶກດີໃຈຫຼາຍ ເພາະເປັນຄົນມັກເບິ່ງຊ່ອງເວີກພ້ອຍຢູ່ແລ້ວ ແຮງໄດ້ເຈິອ້າຍໝ່ຳອີກ ແຮງເຮັດໃຫ້ໄປບໍ່ເປັນເລີຍ ນ້ອງກັບມາເບິ່ງມັນຊ້ຳໆ ກັບຄວາມພູມໃຈໃນຄັ້ງນີ້ ເພື່ອເຕືອນໂຕເອງວ່າຄວາມພະຍາຍາມມັນບໍ່ເຄີຍທຳຮ້າຍໃຜອີຫຼີ.

ສຳລັບ ນັດດາວ ເອງມີຈຸດພິເສດ ເປັນຄົນລ້າເລີງຂ້ອນຂ້າງຕະຫຼົກເລີຍກໍວ່າໄດ້ ແຕ່ພັດມັກຮ້ອງເພງເສົ້າ ເພາະມັນງ່າຍກວ່າເພງໄວ ນ້ອງຈະເປັນຄົນທີ່ຖະນັດເພງຊ້າໆຊຶ້ງໆຫຼາຍກວ່າ ມັນຮ້ອງໄດ້ດີກວ່າເພງໄວ. ສ່ວນເວລາຫວ່າງຂອງນ້ອງຄື ມັກແຕ້ມຮູບ, ຫຼິ້ນກີຕ້າ, ເຕັ້ນ ແຕ່ຈະເປັນຄົນມັກເຕັ້ນໃນຫ້ອງນ້ຳ ອິອິອິ!

ຖ້າຖາມວ່າອານະຄົດນ້ອງຢາກເຮັດຫຍັງ? ບອກເລີຍວ່າ ນ້ອງຢາກເຮັດຫຼາຍຢ່າງເລີຍລະ! ອິອິອິ!!! ແຕ່ອາຊີບຫຼັກໆ ທີ່ນ້ອງຢາກເຮັດຄືການເປັນແມ່ນຄ້າຂາຍເຄື່ອງ, ຮອງລົງມາກະຢາກເປີດຄ້າຍເພງເປັນຂອງໂຕເອງ; ສຳລັບອາຊີບແມ່ຄ້າ ມັນມີແນວໃຫ້ເຮັດຫຼາຍຢ່າງ ຢາກຂາຍຫຍັງກໍໄດ້, ຢາກໃຊ້ເງິນຕອນໃດກໍໄດ້ໃຊ້ ອິອິອິ!!! ອີກຢ່າງນ້ອງມັກເວລາທີ່ແນະນຳເຄື່ອງໃຫ້ລູກຄ້າ, ສ່ວນວຽກນັ່ງຢູ່ຫ້ອງການ ມັນຈຳເຈເກີນໄປເລີກຕາມໂມງ, ເຂົ້າຕາມເວລາ ບໍ່ຄ່ອຍມັກປານໃດ ຖ້າຈະເວົ້າໄປກະຄືມັກອາຊີບອິດສະຫຼະຫຼາຍກວ່າ ວ່າຊັ້ນສະ!.

ແຕ່ປັດຈຸບັນ ຂໍໂຟກັດທີ່ເລື່ອງຮຽນກ່ອນ ແລະ ຢາກເອົາໃຈໃສ່ຮຽນພາສາຕ່າງປະເທດໃຫ້ໄດ້ກ່ອນເຊັ່ນ: ພາສາອັງກິດ ກັບ ພາສາຈີນ ເພາະເປັນພາສາທີ່ມີມີການນຳໃຊ້ຫຼາຍຢູ່ບ້ານເຮົາໃນປັດຈຸບັນ.

More from author

Related posts

ຂໍຂອບໃຈນຳຜູ້ສະໜັບສະໜູນ

Latest posts

ຊໍາຊຸງ ເປີດໂຕ Galaxy Z Fold6 ແລະ Z Flip6 ຍົກລະດັບ Galaxy Al ລຸ້ນໃໝ່ສໍາລັບໂທລະສັບໜ້າຈໍພັບ.

ຊໍາຊຸງລາວ ເປີດໂຕ Galaxy Z Fold6 ແລະ Z Flip6 ພ້ອມໂປຣໂມຊັນພິເສດສໍາລັບຜູ້ທີ່ສັ່ງຊື້ລ່ວງໜ້າທີ່ Galaxy Experience Space ນະຄອນຫຼວງວຽງຈັນ  ເປິດປະສົບການ Galaxy AI ລຸ້ນຫຼ້າສຸດສໍາລັບໂທລະສັບມືຖືໜ້າຈໍພັບ  ໃຫ້ຜູ້ເຂົ້າຮ່ວມງານໄດ້ສໍາຜັດການໃຊ້ງານໂທລະສັບມືຖືທີ່ທັນສະໄໝ  ຮ່ວມກັບໂມງ Galaxy Watch7 ແລະ ຫູຟັງ Galaxy Buds3/Galaxy Buds3 Pro ເຊິ່ງໄດ້ເປີດໂຕພອ້ມກັນໃນງານ Samsung Unpacked ທີ່ປາຣີ  (Paris) ປະເທດຝຣັ່ງ ໃນວັນທີ 10 ກໍລະກົດ 2024 ທີ່ຜ່ານມາ.

ສາຍການບິນ Vietjet ບັນລຸ​ຂໍ້​ຕົກລົງ ​ຍົກລະດັບ​ການ​ເຊື່ອມ​ຕໍ່​ການ​ຂົນ​ສົ່ງ​ທາງ​ອາກາດ ລະຫວ່າງ ສປປ ລາວ ແລະ ສສ ຫວຽດນາມ

(ນະຄອນຫຼວງວຽງຈັນ, ວັນທີ 11 ກໍລະກົດ 2024) - ກະຊວງໂຍທາທິການ ແລະ ຂົນສົ່ງປະຈຳ ສປປ ລາວ ແລະ ສາຍການບິນ Vietjet ປະກາດຂໍ້ຕົກລົງເພີ່ມທະວີການເຊື່ອມຕໍ່ການຂົນສົ່ງທາງອາກາດລະຫວ່າງ ປະເທດລາວ-ຫວຽດນາມ.

Sky Connections ໄດ້ຂະຫຍາຍ: ເສັ້ນທາງໃໝ່ຂອງສາຍການບິນ Vietjet ໃນທົ່ວປະເທດຈີນ ແລະ ເກົາຫຼີໃຕ້

(ນະຄອນຫຼວງວຽງຈັນ, ວັນທີ 08 ກໍລະກົດ 2024) –  ສາຍການບິນ Vietjet ໄດ້ສ້າງບາດກ້າວຄັ້ງໃໝ່ໃນການເຊື່ອມຕໍ່ສາຍການບິນຜ່ານ ພາກພື້ນອາຊີປາຊີຟິກ ດ້ວຍ​ການ​ເປີດ​ບໍລິການ​ໂດຍ​ກົງ​ແຫ່ງ​ທຳ​ອິດ ​ທີ່​ເຊື່ອມ​ຕໍ່​ ນະຄອນໂຮຈີ​ມິນ ​- Xi'an (ຈີນ) ​ແລະ ການ​ປະກາດ​ເສັ້ນທາງ Nha Trang - Daegu (ສ.​ເກົາຫຼີ),